ಶವದ ಮೇಲೆ ಸುರಿಯದಿದ್ದರೇನು ಸುಗಂಧಗಳನು ಸ್ಪರ್ಶಿಸಿ ಹೊರಟುಬಿಡು ಸಖಿ
ಕಣ್ಣ ಹೂ-ಗಳು ಬಿಡುವ ಅತ್ತರಿನ ಹನಿ ಕೊಳುವವರಿರಲು ಮನ್ನಿಸಿ ಹೊರಟುಬಿಡು ಸಖಿ !
ಬದುಕುವಾಸೆಯನು ಬಸೆದುಕೊಟ್ಟೆ ಅದೊಳಿತು ಋಣಿ ನಿನಗೆ ಸ್ಮರಿಸಿ ಹೊರಟುಬಿಡು ಸಖಿ
ಸಾವ ಶಬ್ದಕೋಶಕ್ಕೆ ಈಸೊಂದು ಅರ್ಥಕೊಟ್ಟವರು ಇನ್ನಿಲ್ಲದಿರಲು ನೆನಸಿ ಹೊರಟುಬಿಡು ಸಖಿ !
ಲೋಬಾನದ ಸಂಜೆಗಳ ಕೀಮತ್ ತಿಳಿದು ಹಠಬೇಡ ಕ್ಷಮಿಸಿ ಹೊರಟುಬಿಡು ಸಖಿ
ಬಿಕ್ಕಳಿಸುವ ಚಂದ್ರ ಬೀದಿಗಿಳಿಯಲು ದೀಪಗಳ ಜರೂರೆನು ಆರಿಸಿ ಹೊರಟುಬಿಡು ಸಖಿ !
ನಾಳೆಯ ದೇವರು ನಡುರಸ್ತೆಗಿಳಿದು ಸ್ಮಶಾನದ ದಾರಿ ಕೇಳಲು ಬೆರಳ ತೋರಿಸಿ ಹೊರಟುಬಿಡು ಸಖಿ
ಜಾವದ ಇಬ್ಬನಿ ಯಾರ ಹಣೆ ಮೇಲೆ ನೀರಾಗುವುದೋ ಊಹಿಸಿ ಹೊರಟುಬಿಡು ಸಖಿ !
ಈಗಾಗಲೇ ಮತ್ತೇರಿರಬಹುದಾದ ಸುಲ್ತಾನ-ಸುಖ್ಬೀರರಿಗೆ 'ಅರೋಲಿ'ಯ ಬರುವಿನ್ನು
ಕೇವಲ ಮತ್ತೊಂದು ಬಟ್ಟಲಿಗೆ ನೆಪವೆಂದು ಒಮ್ಮೆ ತಿಳಿಸಿ ಹೊರಟುಬಿಡು ಸಖಿ!
