ಗಜಲ್ -೧
ಹೆಚ್ಚೆಂದರೆ ತುಫಾಕಿ ಎದೆಗೇರಿಸಿ ತುಂಡರಿಸಬಲ್ಲಿರಿ ನೀವು
ಇಲ್ಲ ಎನ್ಕೌಂಟರ್ ನಲಿ ಸಾವ ನಿರೀಕ್ಷಿಸಬಲ್ಲಿರಿ ನೀವು!
ಓದಲಾಗದು ಸ್ಮೃತಿಪಟಲ ಪಡಿಯಚ್ಚು
ಒಡೆಯನಿಗೆ ಕಣ್ಣು ಕಿತ್ತಿಟ್ಟ ಬಗೆ ವಿವರಿಸಬಲ್ಲಿರಿ ನೀವು!
ಕಾಯಿದೆಗಳ ಹೊರಡಿಸಿ ನಿಷೇಧಿಸಲಾಗದು ನಿಟ್ಟಿಸಿರು
ನೆಲ ಸೀಳುವ ಮೊಳಕೆಯೆದುರು ದನಿ ಎತ್ತರಿಸಬಲ್ಲಿರಿ ನೀವು!
ಇನಿತು ಸುಟ್ಟು ; ಕತ್ತರಿಸಿ ಗಲ್ಲಿಗೆರಿಸಿದವರ
ದಫನ್ನಿಗೆ ಜನ ಸೇರದಂತೆ ಆದೇಶಿಸಬಲ್ಲಿರಿ ನೀವು!
ಮೆದುಳುಗಳಿಗೆ ಹೃದಯ ತರಬೇತಿ ಒಂದು ವಿದ್ರೋಹ
ಕಟಕಟೆಯಲಿ ನಿಂತ ಕಾಡುಗಳಿಗೆ ಏನೆಂದು ಉತ್ತರಿಸಬಲ್ಲಿರಿ ನೀವು!
