ಆಕಾಶವಿಲ್ಲದ ಊರಿಗೆ ನಕ್ಷತ್ರ ಕಳುಹಿಸಿ!

ಇಲ್ಲ ಚಂದ್ರನಿಲ್ಲ
ಸೂರ್ಯನೂ ಇಲ್ಲ
ಒಟ್ಟಾರೆ ಆಕಾಶವೇ ಇಲ್ಲದ
ಈ ಊರಿಗೆ ನಕ್ಷತ್ರ ಕಳುಹಿಸಿ
ಬೆಳದಿಂಗಳು ಬೇಡಿದ್ದು
ಯಾವ ದೇಶದ ನ್ಯಾಯ?

ಇಲ್ಲ ಹಾಡು ಹೋಗಿಲ್ಲ
ಯಾವ ಗೆರೆಯೂ ಇಲ್ಲಿ
ಹಸ್ತವೆ ಇಲ್ಲದ ಕೈಯ
ಗಿಳಿಯ ಮುಂದಿಟ್ಟು
ಭೂ-ಮಧ್ಯೆ ರೇಖೆ ಬೇಡಿದ್ದು
ಯಾವ ದೇಶದ ನ್ಯಾಯ?

ಇಲ್ಲ ಕೆರೆಯಿಲ್ಲ
ತೊರೆಯೂ ಇಲ್ಲ
ಪಸೆಯೇ ಇಲ್ಲದ ಈ ನೆಲಕೆ
ಬಿಸಿಲುಗುದುರೆಯ ಬಿಟ್ಟು
ನೀರು ಬೇಡಿದ್ದು
ಯಾವ ದೇಶದ ನ್ಯಾಯ?

ಇಲ್ಲ ಮುಖವಿಲ್ಲ
ಆಕಾರವು ಇಲ್ಲ
ಅಸಲು ಉಸಿರಾಡದ
ಈ ಹೃದಯಗಳಲಿ
ಒಲವ ಬಚ್ಚಿಟ್ಟು
ಸುಮ್ಮನಿರಿ ಎಂದದ್ದು
ಯಾವ ದೇಶದ ನ್ಯಾಯ?