ನದಿತೀರ..!

ಮಹೂವಾ… ಮಹೂವಾ

2011-11-20T03:00:00.000-08:00

ಮಹೂವಾ ಮಹೂವಾ
ಮಾಯದ ಮಹೂವಾ
ಮಹೂವಾ ಮಹೂವಾ
ಮಾಯವಾದೆ ಯಾಕವ್ವ

ಮುಗಿಲಾಗ ಹೂವಿನ ಬುಟ್ಟಿ
ನೆಲದಾಗ ಬಣ್ಣದ ಚಿಟ್ಟಿ
ಹಸಿದರೆ ಹೊಟ್ಟೆಗೆ ರೊಟ್ಟಿ
ದಾರಿಗೆ ನೆರಳನು ಕೊಟ್ಟಿ IIಮಹೂವಾ ಮಹೂವಾII

ಮೊಹ ಮಹುಲ ಇಲುಪ ಹಿಪ್ಪೆ
ಬಳಸದಿದ್ರೆ ಬಾಯಿ ಸಪ್ಪೆ
ಗುಡಿಸಲ ಜೇನು ತುಪ್ಪೆ
ಕರುವಿಗೆ ಹುಡಿ ಸೊಪ್ಪೆ IIಮಹೂವಾ ಮಹೂವಾII

ಗೊಂಡಮ್ಮ ಗಂಡನಿಗೆ
ಹುಳಿ ಹೆಂಡಮ್ಮ ನೀನು
ಕೊಯ ಕಂದಮ್ಮಗಳಿಗೆ
ಕೊಬ್ಬರಿಗೆ ಬೆಲ್ಲ ನೀನು IIಮಹೂವಾ ಮಹೂವಾII

ಸಂತಾಲ ಸುಂದರಿ ಜಡೆಗೆ
ಸಂತೆ ಹೂವಿನ ದಂಡೆ
ಸೋಲಿಗ ಸಿದ್ದಿಗಳಿಗೆ
ಸಾಬೂನು ಕೈ ಉಂಡೆ IIಮಹೂವಾ ಮಹೂವಾII

ಗಿಳಿ ಗುಬ್ಬಚ್ಚಿ ನಿನ್ನ
ಹಳೆ ಬಂಧುಗಳೇನೆ
ಬೆಳವ ಗೊರವಂಕ ನಿನ್ನ
ಮನೆ ಹಿರಿ ಮಕ್ಕಳೇನೆ IIಮಹೂವಾ ಮಹೂವಾII

ಇಂತಿಪ್ಪ ನಿನ್ನ ಬುಡಕೆ
ಕಾಯ್ದೆ ಕಾನೂನು ಯಾಕೆ
ಬೇರಿಗೆ ಹಗ್ಗವ ಕಟ್ಟಿ
ನೆಟ್ಟೋರ ಅಲ್ಲಿಂದ ಅಟ್ಟಿ IIಮಹೂವಾ ಮಹೂವಾII

ನವಿಲೇ ನೀ ನ್ಯಾಯ ಕೇಳೆ
ಇರುವೆ ನೀನೆಲ್ಲಿರುವೆ
ಕಾಗಕ್ಕ ಕಾರಣ ಕೇಳೆ
ಗೂಬೆ ನೀ ಮಾತಾಡೆ IIಮಹೂವಾ ಮಹೂವಾII

________________________________________________________________

ಟಿಪ್ಪಣಿ:
ನಮ್ಮ ದೇಶದ ಮಧ್ಯೆಪ್ರದೇಶ ಸೇರಿದಂತೆ ಮಹಾರಾಷ್ಟ್ರ,ಒರಿಸ್ಸಾ, ಚತ್ತೀಸ್ಗಡ, ಜಾರ್ಖಂಡ್ ಕಾಡಿನಲ್ಲಿ ಬೆಳೆವ ಈ ಹೂವು ಸಪೋಟಾಸಿಯೆ ಎಂಬ ಜಾತಿಗೆ ಸೇರಿದ್ದು, ವರ್ಷಕ್ಕೆ ೨೦ ರಿಂದ ೨೦೦ ಕೇಜಿ ಬೀಜ ಬಿಡುತ್ತದೆ. ಗಿರಿಜನ/ ಆದಿವಾಸಿಗಳ ಆಹಾರ ಪದಾರ್ಥವಾಗಿದ್ದು ಒಣಗಿದ ಹೂವನ್ನು ಸ್ಥಳೀಯ ಮದ್ಯ ತಯಾರಿಕೆಗೆ ಬಳಸುತ್ತಾರೆ. ಮತ್ತು ಇದರ ಇತರೆ ಭಾಗಗಳನ್ನು ಚಾಕಲೇಟ್, ಔಷಧಿ, ಸಾಬೂನು ಅಲ್ಲದೆ ಗೊಬ್ಬರ ತಯಾರಿಕೆಗೆ ಬಳಸುತ್ತಾರೆ . ನಿಸರ್ಗದಲ್ಲಿ ಉಚಿತವಾಗಿ ಲಭ್ಯಯಿರುವ ಈ ಮರದ ಉತ್ಪನ್ನಗಳ ಮೇಲೆ ಸರಕಾರ ನಿರ್ಬಂಧಗಳನ್ನು ಹೇರಿ ಗಿರಿಜನರ ಬದುಕುವ ಹಕ್ಕನ್ನೇ ಕಸಿಯುತ್ತಿದೆ. ಮಧ್ಯವರ್ತಿಗಳ ಹಾವಳಿಯಿಂದಾಗಿ ಸರಿಯಾದ ಬೆಲೆ ಸಿಗುತ್ತಿಲ್ಲ.

* ಮೊಹ, ಮಹಲ, ಇಲುಪ, ಹಿಪ್ಪೆ, ಇಪ್ಪೆ, ಪೂನಮ, ಮಹೂವಾದ ಇತರೆ ಹೆಸರು.
* ಗೊಂಡ, ಕೊಯ, ಸೋಲಿಗ, ಸಿದ್ದಿ ಮತ್ತು ಸಂತಾಲ ವಿವಿಧ ಬುಡಕಟ್ಟುಗಳು.

ಪಾದದ ಮೇಲೆ ಹುಟ್ಟು ಮಚ್ಚೆಯಾಗಿ ತಂಗ್ಯಮ್ಮಾ...: ಗದ್ದರ್

2011-08-12T16:41:00.000-07:00

ರಕ್ಷಾ ಬಂಧನ, ಬಹುಶ: ರಕ್ತ ಸಂಬಂಧಯಿಲ್ಲದೆಯೂ ಒಂದು ಕಮ್ಮನೆಯ ಅಕ್ಕ-ತಂಗಿ, ಅಣ್ಣ-ತಮ್ಮ೦ದಿರ ಪ್ರೀತಿಯನ್ನು
ಎಂಥವರಿಗೂ ಮೊಗೆದು ಕೊಡಬಹುದಾದ ಹಬ್ಬ. ಮತ್ತು ರಾಖಿ ಹಬ್ಬದ ಕುರಿತು ಈಗಾಗಲೇ ಬೇರೆ ಬೇರೆ ಭಾಷಾ ಸಾಹಿತ್ಯದಲ್ಲಿ ಸಾಕಷ್ಟು ಬರೆಯಲಾಗಿದೆ. ಸಿನಿಮಾಗಳಲ್ಲಂತೂ ಎಕರೆಗಟ್ಟಲೆ ತೋರಿಸಲಾಗಿ ರಾಖಿ ಕಟ್ಟಿಸಿಕೊಂಡರೆ ಕಡ್ಡಾಯವಾಗಿ ಏನಾದರು ಗಿಫ್ಟ್ ಕೊಡಲೇಬೇಕೆಂಬ ಗೊತ್ತುವಳಿ ಒಂದು ಜಾರಿಯಾದಂತಿದೆ.

ಆದರೆ ದಶಕ ಹಿಂದೆ ತೆಲುಗುವಿನಲ್ಲಿ ಆರ್ ನಾರಾಯಣ ಮೂರ್ತಿ ನಿರ್ಮಿಸಿದ'ಓರಾಯ್ ರಿಕ್ಷಾ' ಸಿನಿಮಾಕ್ಕೆ ಗದ್ದರ್ ಬರೆದ 'ಮಲ್ಲೆ ತೀಗಕು ಪಂದಿರಿ ವೋಲೆ' ಹಾಡು ಎಂಥ ಅಧ್ಬುತವಾಗಿ ಮೂಡಿ ಬಂದಿದೆ ಎಂದರೆ ಇವತ್ತಿಗೂ ರಕ್ಷಾ ಬಂಧನ ದಿವಸ ಆ ಹಾಡನ್ನು ಪ್ರಾರ್ಥನೆ ಗೀತೆ ಎಂಬಂತೆ ಜನ ಮತ್ತೆ ಮತ್ತೆ ಕೇಳುತ್ತಾರೆ. ಒಬ್ಬ ಬಡ ರಿಕ್ಷಾ ತುಳಿಯುವ ಅಣ್ಣನ ನಿವೇದನೆ ಈ ಹಾಡು. ಜಾನಪದ ಸೊಗಡನ್ನು ಜನರ ಭಾಷೆಯಲ್ಲೇ ಹೆಣೆದು ಅವರನ್ನು ಎಚ್ಚರಗೊಳಿಸುವ ಅದೆಷ್ಟೋ ಗೀತೆ ರಚಿಸಿರುವ ಗದ್ದರ್ ಈ ಗೀತೆ ರಚನೆಗೆ ಆಂಧ್ರ ಪ್ರದೇಶದ ನಂದಿ ಅವಾರ್ಡ್ ಬಂದರು ಸ್ವೀಕರಿಸಲಿಲ್ಲ. ವಂದೇ ಮಾತರಂ ಶ್ರೀನಿವಾಸ್ ಹಾಡಿರುವ ಈ ಗೀತೆಯ ವಿಡಿಯೋ ಮತ್ತು ಅದರ ಭಾಷಾಂತರ ಇಲ್ಲಿದೆ.

ಪಾದದ ಮೇಲೆ ಹುಟ್ಟು ಮಚ್ಚೆಯಾಗಿ ತಂಗ್ಯಮ್ಮಾ...
__________________________________________________

ಮಲ್ಲಿಗೆ ಬಳ್ಳಿಗೆ ಹಂದರ ವೋಲೆ
ಮಬ್ಬುಗತ್ತಲಲ್ಲಿ ಬೆಳದಿಂಗಳ ವೋಲೆ
ನಿನ್ನ ಪಾದದ ಮೇಲೆ ಹುಟ್ಟು ಮಚ್ಚೆಯಾಗಿ ತಂಗ್ಯಮ್ಮ
ಒಡ ಹುಟ್ಟಿದ ಋಣ ತೀರಿಸುವೆನೆ ತಂಗ್ಯಮ್ಮ

ಮೈನೆರೆದ ಮರು ಘಳಿಗೆಯಿಂದಲೆ
ಹೆಣ್ಣುಮಗು ಮೇಲೆ ಏಸೊಂದು ಎಣಿಕೆ
ಕಾಣುವುದೆಲ್ಲ ನೋಡದಿರೆ೦ದರು
ನಗುವ ಮಾತಿಗೂ ನಗಬೇಡೆ೦ದರು

ಅಂಥ ಅಣ್ಣ ನಾನಾಗಲಾರೆ ತಂಗ್ಯಮ್ಮ
ನಿನ್ನ ಬಾಲ್ಯಕಾಲದ ಗೆಳೆಯನಮ್ಮ ತಂಗ್ಯಮ್ಮ
ಕಾಡಿನೊಳಗೆ ನವಿಲು ವೋಲೆ ತಂಗ್ಯಮ್ಮ
ಆಟ ಆಡಿಕೋ ಹಾಡು ಹಾಡಿಕೋ ತಂಗ್ಯಮ್ಮ IIಮಲ್ಲಿಗೆ ಬಳ್ಳಿಗೆ ಹಂದರ ವೋಲೆ II

ಬಳಲಿ ಹೋಗಿ ನೀ ಕಳೆಗುಂದಿದ್ದರೆ
ಬೆನ್ನುಮೂಳೆ ಆಗಿ ಒಳ ಬಂದೆನಮ್ಮ
ಒಂದುಕ್ಷಣ ನೀ ಕಾಣದಿದ್ದರೆ
ನನ್ನ ಕಣ್ಣಾಲಿಗಳು ಕಮರಿ ಹೋದವು

ಒಂದು ಕ್ಷಣ ನೀ ಮಾತುಬಿಟ್ಟರೆ ತಂಗ್ಯಮ್ಮ
ನಾ ದಿಕ್ಕಿಲ್ಲದ ಹಕ್ಕಿಯಾದೇನೆ ತಂಗ್ಯಮ್ಮ
ತುತ್ತು ತಿನ್ನದೇ ಮುನಿಸಿಕೊಂಡರೆ ತಂಗ್ಯಮ್ಮ
ನನ್ನ ಭುಜಬಲವೇ ಬಿದ್ದು ಹೋದಿತೆ ತಂಗ್ಯಮ್ಮ IIಮಲ್ಲಿಗೆ ಬಳ್ಳಿಗೆ ಹಂದರ ವೋಲೆ II

ಓದಿದಷ್ಟು ನಿನ್ನ ಓದಿಸ್ತೀನಮ್ಮ
ಬೆಳೆಯುವಷ್ಟು ನಿನ್ನ ಬೆಳೆಸ್ತೀನಮ್ಮ
ಜೋಡೊಂದು ಕೂಡೋ ಹೊತ್ತಿಗೆ
ಹೂವೋ ಎಲೆಯೋ ಜೋಡಿಸ್ತಿನಮ್ಮ

ಮೆಚ್ಚಿದವಗೆ ಕೊಡುವೆ ನಿನ್ನ ತಂಗ್ಯಮ್ಮ
ನನ್ನ ಕಣ್ಣೀರಿಂದ ಕಾಲು ತೊಳೆಯುವೆ ತಂಗ್ಯಮ್ಮ
ರಿಕ್ಷಾ ಗಾಡಿಯ ತೇರು ಮಾಡುವೆ ತಂಗ್ಯಮ್ಮ
ನಿನ್ನ ಅತ್ತೆಮನೆಗೆ ಹೊತ್ತೊಯ್ಯುವೆ ತಂಗ್ಯಮ್ಮ IIಮಲ್ಲಿಗೆ ಬಳ್ಳಿಗೆ ಹಂದರ ವೋಲೆ II

_____________________________________________________

ಕನ್ನಡಕ್ಕೆ : ರಮೇಶ ಅರೋಲಿ

ನವಿಲು ಸಾಕಿದೆನವ್ವ...

2011-07-12T02:58:00.000-07:00

ನವಿಲು ಸಾಕಿದೆನವ್ವ
ನಾನೊಂದ ನವಿಲು ಸಾಕಿದೆನವ್ವ
ನವಿಲು ಸಾಕಿದೆನವ್ವ
ಬಣ್ಣದ ನವಿಲು ಸಾಕಿದೆನವ್ವ

ಬೆರಳಾಗ ಗರಿಗೆದರಿತ್ತು
ನೆರಳಾಗ ಕಣ್ಣು ಹೊರಳಿತ್ತು
ಸುಣ್ಣದ ಗ್ವಾಡಿ ಮ್ಯಾಲ
ಚಣ್ಣ೦ತ ನೆಗೆದಾಡಿತ್ತು II ನವಿಲು ಸಾಕಿದೆನವ್ವ II

ನಟ್ಟನಡು ಹಗಲಿನಾಗ
ಗುಟ್ಟಾಗಿ ಕೂಡುವ ನವಿಲು
ತಿಂಗಳದ ಬೆಳಕಿನ್ಯಾಗ
ಅಂಗಳಕ ಬರುವ ನವಿಲು II ನವಿಲು ಸಾಕಿದೆನವ್ವ II

ಪಾತರದ ಪಂಚೆ ಉಟ್ಟು
ಯಾತರದೊ ಹಾಡ ಕಟ್ಟಿ
ಬೆಳಕಿನ ದಿಬ್ಬದ ಮ್ಯಾಲ
ಕತ್ತಲು ಕುಣಿದ್ಹ೦ಗಿರುವ II ನವಿಲು ಸಾಕಿದೆನವ್ವ II

ಪಾಟಿಚೀಲದ ಒಳಗಾ
ಕ್ವಾಟೆಯ ಮಾಡಿಕೊಂಡು
ಮೂರು ತಿಂಗಳದೊಳಗ
ಆರಾರು ಮಕ್ಕಳ ಹಡೆವ II ನವಿಲು ಸಾಕಿದೆನವ್ವ II

ಮೂರು ಲೋಕದ ಕಣ್ಣು
ಸೆಳೆದಂತ ಮೂಗುತಿ ಹೆಣ್ಣು
ಒಡೆದ ಬಲೆ ಚೂರಿನಲ್ಲು
ಕಟೆದ್ಹ೦ಗ ಕಾಮನಬಿಲ್ಲು II ನವಿಲು ಸಾಕಿದೆನವ್ವ II

ಒಂಟಿ ಕಾಲಿಲೆ ಕುಣಿದು
ಮೋಡದ ಗಂಟೆ ಬಾರಿಸಿದಂತ
ಎಂಟೂರು ರೈತರ ಕರೆದು
ಭೂಮಿ ಕುಂಟೆ ಹೊಡಿಸಿದಂತ II ನವಿಲು ಸಾಕಿದೆನವ್ವ II

2011-06-05T06:03:00.000-07:00

ತೆಲುಗು ಕಾವ್ಯ ಜಾತ್ರೆಯಲ್ಲಿ ಗೇಯರೂಪ ಕವಿತೆಯ ತೇರು ಎಳೆದು ಬಹುದೂರ ಹಾದಿ ಸವೆಸಿದ ರಚನಾಕಾರರಿದ್ದರೆ. ಆ ಹಾದಿ ತುಳಿದ ಅನೇಕ ಆಧುನಿಕ ಕವಿಗಳು ಇಲ್ಲಿದ್ದಾರೆ. ಇಂತಹ ಗೇಯ ಕವಿತೆಗೆ ಮರುಜನ್ಮ ಕೊಟ್ಟಿದ್ದು ಗದ್ದರ್. ಆದರೆ ಆ ಕೂಸನ್ನು ಎತ್ತಿ, ಆಡಿಸಿ-ಮುದ್ದಾಡುತ್ತಿರುವುದು ಗೋರಟಿ ವೆಂಕನ್ನ. ಮೂರು ದಶಕಗಳ ಕಾಲ ಕಾವ್ಯ ಕೃಷಿಯಲ್ಲಿ ತೊಡಗಿರುವ ವೆಂಕನ್ನನ ದನಿಗೆ ಹಳ್ಳಿಗಾಡಿನಲ್ಲಿ ಅಲ್ಲೆಲ್ಲೋ ಅಲೆಯುತ್ತಿರುವ ದಾಸಯ್ಯನ ಏಕನಾದದ ಗತ್ತಿದೆ. ಜಾಗತೀಕರಣದ ಕುಲುಮೆಯಲ್ಲಿ ನಲುಗುತ್ತಿರುವ ಗ್ರಾಮ ವೃತ್ತಿಗಳು, ಅಲ್ಲಿನ ಕರುಣಾಜನಕ ಬದುಕಿನ ಸ್ಥಿತಿಯೇ ಇವರ ಕಾವ್ಯದ ವಸ್ತು. ಪ್ರಕಟವಾದ ಸಂಕಲನಗಳು: 'ಏಕನಾದಂ', 'ರೇಲ ಪೂತಲು' ಮತ್ತು 'ಅಲ ಸೆಂದ್ರವಂಕ'. ೨೦೧೦ ರಲ್ಲಿ ಪ್ರಕಟವಾದ 'ಅಲ ಸೆಂದ್ರವಂಕ' ಸಂಕಲನದಿಂದ 'ವಾನೋಚ್ಚೆನಮ್ಮಾ' ಕವಿತೆಯ ಅನುವಾದ ಈ "ಮಳೆ ಬಂತಮ್ಮಾ.."

ಮಳೆ ಬಂತಮ್ಮಾ...

ಮಳೆ ಬಂತಮ್ಮಾ…

ಮಳೆ ಬಂತಮ್ಮಾ ನೆರೆ ಬಂತಮ್ಮಾ
ಮಳೆಯ ಜತೆಯಾಗಿ ತೊರೆ ಬಂತಮ್ಮಾ
ಮರದ ಹೆರಳ ಮೇಲೆ ಬೆರಳು ಬೆರಳಾಗಿ ಉದುರಿ
ದಡದ ಬಂಡೆ ಮೇಲೆ ಗಂಧದಿ ಹರಿದಿದೆ
ಕೊಟ್ಟಿಗೆಗಿಳಿದು ಕೊಳೆಯೆಲ್ಲ ತೊಳೆದು
ಕೋಳಿಹುಂಜ ತುರುಬು ನವಿರಾಗಿ ಸವರಿ
ಎಮ್ಮೆಕೋಣಗಳಿಗೆ ಗಮ್ಮತ್ತು ತಂದಿದೆ
ದನದ ಹಿಂಡನು ಕರೆದು ಕೆರೆಯಲ್ಲಿ ಅದ್ದೀದೆ IIಮಳೆ ಬಂತಮ್ಮಾ II

ಹದ್ದುಗೂಡಿನಲ್ಲಿ ಹುಲ್ಲನು ತೋಯಿಸಿ
ಗುಬ್ಬಿಗೂಡಿನ ಕಲ್ಲು ಹರಳನು ಸರಿಸಿದೆ
ಟಿಟ್ಟಿಭ ಗಂಟಲು ಸಿಹಿಯನು ಹೆಚ್ಚಿಸಿ
ಪಿಕಳಾರ ಮೂಗಿನ ಪಾಚಿಯ ತೊಳೆದಿದೆ
ಎತ್ತಿನ ಡುಬ್ಬವ ಮುದ್ದಾಡಿ ನಲಿದು
ನೇಗಿಲ ಒಡಲನು ತಣ್ಣಗೆ ಮಾಡಿದೆ IIಮಳೆ ಬಂತಮ್ಮಾ II

ಹೊಸ ನೀರಾಗಿ ಬಂದು ಹೊಂಡಾವ ಸೇರಿ
ಹಸಿರು ಪಾಚಿಯ ತುಕ್ಕು ಹಸನಾಗಿ ತೊಳೆದಿದೆ
ಮೀನಿಗೆನೋ ನೀರ ಹುಳಿಯನು ಕುಡಿಸಿದೆ
ಕೊಕ್ಕರೆಗೆ ಔತಣದ ಕೋರಿಕೆ ತಂದಿದೆ
ಕಪ್ಪೆಗಳ ಹಬ್ಬವ ಕಣ್ಣಾರೆ ಕಂಡು
ಆಮೆ ಮದುವೆಗೆ ತಲೆನೀರು ಸುರಿದಿದೆ IIಮಳೆ ಬಂತಮ್ಮಾ II

ಕರಿ ನೆಲದ ಬಿರುಕೆಲ್ಲ ಕೈಯ್ಯಾರೆ ಸವರಿ
ಎರೆಭೂಮಿ ನೆಲವನು ಗದ್ದೆಯ ಮಾಡಿದೆ
ಮಣ್ಣುಗಡ್ಡೆಯ ನಡುವೆ ಖವ್ವಾತು ಮಾಡಿ
ಸವಳು ಭೂಮಿಯ ತಾಕಿ ಓಟವ ಕಿತ್ತಿದೆ
ಉಕ್ಕುವ ಹೆಂಡದಿ ತಣ್ಣೀರು ಸುರಿದು
ಈಚಲುಗಿಡ ಗಡಿಗೆ ಮೂತಿಯ ತೊಳೆದಿದೆ IIಮಳೆ ಬಂತಮ್ಮಾ II

ತಾ ಬರುವ ಮುಂಚೇನೆ ತೂಮುಗಳ ಎಬ್ಬಿಸಿ
ತನ್ನ ಹಾಡಿಗೆ ತಾನೇ ತಾಳ ಹಾಕಿದೆ ನೋಡು
ಬಿಳಿ ಮಲ್ಲಿಗೆ ಬಣ್ಣ ಮತ್ತಷ್ಟು ಬಿಳುಪಾಗಿಸಿ
ಕೆಂಪು ಮಲ್ಲಿಗೆ ತೊಳೆದು ಕಂಪನು ಸೂಸಿದೆ
ತುಲಶಮ್ಮ ದೀಪದ ಚಿಪ್ಪುವಿನಲಿ ಸೇರಿ
ಹೂ ಬಿಸಿಲ ಹರಳಲ್ಲಿ ನಿಗ ನಿಗಾ ಎಂದಿದೆ IIಮಳೆ ಬಂತಮ್ಮಾ II

ವೆಮುಲಾಡ ರಾಜನ್ನ ಪ್ರಾರ್ಥನೆ ನೋಡಿ
ಪಕ್ಕದ ಮನೆಗಳ ಜಳ ಜಳ ತೊಳೆದಿದೆ
ಅರಳಿ ಎಲೆ ತೋಯಿಸಿ ಉರುಳಿ ಉರುಳಿ ಬಿದ್ದು
ಸಾಧುಗಳ ಸಮಾಧಿ ಸನ್ನಿಧಿಗೆ ಸೇರಿದೆ
ಸೂಫಿ ದರ್ಗಾ ಸುತ್ತಿ ಸಲಾಮು ಮಾಡಿದೆ
ನೆಗೆವ ನಂದಿಕೋಲಿಗೆ ಬೆಳ್ಳಿ ಮೆರುಗದ್ದಿದೆ IIಮಳೆ ಬಂತಮ್ಮಾ II

ಹರಿದಾಡಿ ಹರಿದಾಡಿ ಗೋದಾವರಿಯನು ಸೇರಿ
ಸೀತಮ್ಮ ಪಾದಗಳ ಶಿರಭಾಗಿ ತಾಕಿದೆ
ಅಂಕು ಡೊಂಕಾಗಿ ವನವೆಲ್ಲ ತಿರುಗಿ
ಕೃಷ್ಣಮ್ಮ ಒಡಲಲಿ ಇಷ್ಟಾದಿ ಉಡುಗಿದೆ
ದುಂದುಭಿ ತಲೆ ತಾಕಿ ದೂಳೆಲ್ಲ ತೊಳೆದು
ಅಂದಾದ ಉಸುಕನು ಕನ್ನಡಿಯ ಮಾಡಿದೆ
ಇಷ್ಟ ಇದೆಯೋ ಇಲ್ಲೋ ಪ್ಯಾಟೆಗೆ ಬಂದಿದೆ
ಮೂಗು ಮುಚ್ಚಿಕೊಂಡು ಮೂಸಿಯಲಿ ಮುಳುಗಿದೆ IIಮಳೆ ಬಂತಮ್ಮಾ II

_________________________________________________________________
ತೂಮು= ಮಳೆಹುಳ, ಮೂಸಿನದಿ= ಹೈದರಾಬಾದ್ ನಗರದಲ್ಲಿ ಹರಿಯುವ (ಈಗ ಚರಂಡಿಯಾಗಿ ಉಳಿದ) ನದಿ ಹೆಸರು. ವೆಮುಲಾಡ ರಾಜನ್ನ= ಕರೀಂ ನಗರ ಜಿಲ್ಲೆಯ ವೆಮುಲವಾಡದಲ್ಲಿರುವ ದೇವಸ್ಥಾನ ಮತ್ತು ಅಲ್ಲಿರುವ ರಾಜ ರಾಜೇಶ್ವರ ಸ್ವಾಮಿ.

ಕನ್ನಡಕ್ಕೆ : ರಮೇಶ ಅರೋಲಿ.

ಅಳಿಲುಂಡ ಗೂಡಾಗ ಮಳೆ ನಿಂತು ನೋಡೈತೆ

2011-04-09T03:31:00.000-07:00

ಸುವ್ವಿ ಸುವ್ವಿ ಲಾಲಿ ಸುವ್ವಿ ಸುವ್ವಕ್ಕ
ಸುಮ್ಮಾನೆ ಕುಂತ್ಯಾಕ ಮಳೆ ಸುರಿಯೋ ಕಾಲಕ್ಕ
ನೀ ಸುಮ್ಮನೆ ಕುಂತ್ಯಾಕ ಮಳೆ ಸುರಿಯೋ ಕಾಲಕ್ಕ

ಬೂದಿಯಾಗುವ ಗುಟ್ಟು ಗಾಳಿ ಮಾತಿಗೆ ಬಿಟ್ಟು
ರಾತ್ರಿ ಅಂಗಳಕ ಹಗಲಿನ ಸಸಿನೆಟ್ಟು
ಕಾಯುತ್ತಾ ಕಾಯುತ್ತ ಕಾಯಾದೇನೋ ನಾ ಹಣ್ಣಾದೇನೋ

ಯಾರ ಅಂಜಿಕಿ ಊರ ಸಣ್ಣ ಹಳ್ಳಕ್ಕ
ಎಲ್ಲೆಲ್ಲೋ ಹರಿಯಿತು ಯಾರದೋ ಪುಣ್ಯಕ್ಕ
ಪುಣ್ಯ ಎಲ್ಲೆಲ್ಲೋ ಹರಿಯಿತು ಯಾರದೋ ಪಾಪಕ್ಕ

ನೆಂಟ ನೆಂಟರ ಗಂಟು ಕಾಲು ಹಾದ್ಯಾಗ
ನಡು ಇರುಳ ಮೆರವಣಿಗಿ ಕಾಗಿ ಬಿದ್ಯಾಗ
ನಡಿಯುತ್ತಾ ನಡಿಯುತ್ತಾ ಕೆರೆಯಾದೇನೋ ನಾ ನದಿಯಾದೇನೋ

ನೆಲವೆಲ್ಲ ನಕ್ಕೀತು ಮಕ್ಕಾಳಾಡೋದಕ್ಕ
ಆಕಾಶ ಅತ್ತೀತು ಅವರಿಲ್ಲದ ಲೋಕಕ್ಕ
ಲೋಕ ಮೂಕವಾಯಿತು ನೋಡ ಮೋಡಯಿಲ್ಲದ ವೇಳಕ್ಕ

ಹೂ ಉದುರಿ ಹೋದವು ಹೂ-ಬಿಸಿಲ ಕಾಡಲ್ಲಿ
ಮಳೆ ನಿಂತು ಹೋಯಿತು ಅಳಿಲುಂಡ ಗೂಡಲ್ಲಿ
ನೋಡುತ್ತಾ ನೋಡುತ್ತಾ ಗಿದ್ವಾದೇನೋ ನಾ ದಡವಾದೇನೋ

ಗಜಲ್

2011-04-09T03:22:00.000-07:00

ಎಷ್ಟು ಕಾಲ ಎಂಥ ಮಾತು ವ್ಯರ್ಥ ಮಾಡಿತು ಸಣ್ಣ ಮುನಿಸಿಗೆ ಜಗವೆಂಥ ಸೋಜಿಗ
ಕಟ್ಟಲಾಗದೆ ಕೈಗೋಡೆ ಕಣ್ಣ ಝಾರಿಗೆ ನಿದ್ರೆ ಮರೆಯಿತು ಜಗವೆಂಥ ಸೋಜಿಗ

ಎಷ್ಟು ರೂಮಿಗಳು ಎಂಥ ಗಜಲುಗಳು ದುಃಖ ನಿಲ್ಲಿಸದಿರಲು
ತಾಯಿತ ಕಟ್ಟಿತು ಮೊಲೆಗೂಸಿನ ಅಳುಕೇಕೆಗೆ ಜಗವೆಂಥ ಸೋಜಿಗ

ಎಷ್ಟು ಬಾದಾಶಗಳು ಎಂಥ ಬಹುದ್ದೂರರು ಗೆದ್ದರು ಸೋತರು
ಕೊನೆಗೆ ಕಟ್ಟಿಸಿಕೊಂಡರು ಗೋರಿ ದಿನಗೂಲಿ ರೊಟ್ಟಿಯ ನೀಡಿ ಜಗವೆಂಥ ಸೋಜಿಗ

ಎಷ್ಟು ಸಾವು ಎಂಥ ಶೋಕ ಋಣದ ಕೊನೆಯ ಮನೆಗೆ
ಮಣ್ಣುಕೊಟ್ಟು ಬೆನ್ನು ಮಾಡಿತು ಮಗುವಾಗುವಾಸೆಗೆ ಜಗವೆಂಥ ಸೋಜಿಗ

ಎಷ್ಟು ಸುಂದರಿಯರು ಎಂಥ ಪ್ರತಿಮೆಗಳು ಲೋಕದಂಗಡಿಯಲ್ಲಿ
ಪಾಪ ಪರಿ ಪರಿಯ ಬೇಡಿದವು ಕ್ಷಣ ಉಸಿರಿಗೆ ಅರೋಲಿಯ ಜಗವೆಂಥ ಸೋಜಿಗ

ಕ್ಷಮೆ ಕೋರಿ

2011-02-22T09:55:00.001-08:00

ಕಿಕ್ಕಿರಿದ ರಸ್ತೆಗೆ
ಆಕಾಶ ಹಾಸಿ
ತುಕ್ಕು ತೇರಿಗೆ ಚುಕ್ಕಿಗಳಂಟಿಸಿ
ಬೇವಿನ ಮರಕ್ಕೆ ಮಾವಿನ ಎಲೆ ಕಟ್ಟಿ
ಸಂಜೆ ದೇವರ ದರುಶನಕೆ
ಕರೆಯೋಲೆ ಕೊಟ್ಟು
ಬಂದ ಬರಿಗಾಲ ಬಸಯ್ಯರಿಗೆ
ರಥಬೀದಿ ನಿಷೇಧಯೆಂದವರ
ಓ ಆಕಾಶವೇ ಕ್ಷಮಿಸು

ನೀನು ಮಾತು ಕೊಟ್ಟಂತೆ ಸುರಿದ
ಎಲ್ಲ ಹನಿಗಳ ಮುತ್ತಾಗಿಸದೆ ಹೋದೆ
ಸೂಳೆ ಮಕ್ಕಳು ಕೂಡ
ಸುತ್ತ ಎದೆಗಾಯದ ಗಾದೆಗಳೆಂದು
ಕಪ್ಪೆಚಿಪ್ಪುವಿನಲಿ ಮೊಟ್ಟೆಗಳಾಗಿಟ್ಟುಕೊಂಡಿದ್ದೆ
ಪಾಪ ಅಮಾಯಕ ಬಾಲ ಏಸುಗಳು
ಸಮುದ್ರದ ಕಡೆಗಾಲ ಕುಡುಗೋಲಿನೇಟಿಗೆನಲು
ಕಾವು ಕೂಡ ತಗುಲದಂತೆ ಬಚ್ಚಿಟ್ಟುಕೊಂಡಿದ್ದೆ
ಓ ಕಡಲೆ ಕ್ಷಮಿಸು

ನಿನ್ನ ಮುನಿಸಿಗೆ ಸಾವುಗಳಿಲ್ಲಿ
ಸುಗ್ಗಿಯ ನಾಯಿಕೊಡೆ ಕರುಣೆಗೆ
ಅಲೆಯ ತುಟಿಯಾಗಿ ಪಾದಮುತ್ತಿಕ್ಕುವೆ
ನೆಲದ ದಿಮ್ಮನಿಸಿಯ ಮಾತು
ನಿನಗೂ ತಲುಪಲಿ

ಈಗ ಸ್ವಲ್ಪ ಮಳೆಯಾಗಲಿ
ನನಗೆ ಬಾಯಾರಿಕೆ.

ಚಳಿ ಅಂಕುಶಮಿಟ್ಟೋಡೆ ನೆನೆವುದೆನ್ನ ಮನಂ ರಾಯಚೂರು ಸೀಮೆಯುಂ...!

2011-02-14T01:11:00.000-08:00

ಭಯ್ಯಾ..ಚಿಕೂ ಜ್ಯೂಸ್ ಹೈ?
ಬನಾನ ಹೈ.(ಮಾಡ್ಬೇಕು)
ಜಲ್ದಿ ಬನಾವೋ.
.................
ಏ ಲಿಜಿಯೇ
ಅರೆ! ಏ ಕ್ಯಾ ಹೈ?
ವಹಿ ಬನಾನ (banana-ಬಾಳೆ ಹಣ್ಣಿನ)ಜ್ಯೂಸ್ !!

ಇದು ನನ್ನ ದೆಹಲಿಯ ಮುಲಾಖಾತ್!

ಫಲವತ್ತಾದ ರಾಯಚೂರಿನ ಬಿಸಿಲ ಮಹಲ್ ನಲ್ಲಿ ಹುಟ್ಟಿದ ನನಗೆ ದೆಹಲಿಯೆಂಬ (ಸದ್ಯ) ಬಿಸಿಲ ಬರಗಾಲದ ಊರಲ್ಲಿ ಕೆಲಸ ಕುದುರಿದ್ದು ಅದೂ ವಿಮೆನ್ಸ್ ಕಾಲೇಜಿನಲ್ಲಿ. ಇಲ್ಲಿಯ ಜನ, ಭಾಷೆ ಮತ್ತವರ ಸ್ವಭಾವ ಅಲ್ಲದೆ ಆಹಾರ ಇತ್ಯಾದಿಗಳೆಲ್ಲವೂ ಭಿನ್ನವೇ ಸರಿ. ದಕ್ಷಿಣದಿಂದ ಬದುಕಿನ ದಂಡಯಾತ್ರೆಗೆ ಬರುವ ಕನ್ನಡಿಗರು ಸೇರಿದಂತೆ ತಮಿಳರು, ಮಲೆಯಾಳಿಗಳು, ತೆಲುಗರು ಇಲ್ಲಿಯವರಿಗೆ ಒಂದೇ ಬೀಡಿ ಫ್ಯಾಕ್ಟರಿಯ ಮದ್ರಾಸಿ ಬ್ರ್ಯಾಂಡುಗಳು.

ಮುಜುಗರವೆಂಬ ಆಜನ್ಮ ಕವಚ ಕುಂಡಲಧಾರಿಯಾದ ನಾನು ಕಮಲ ನೆಹರು ಕಾಲೇಜೆಂಬ (ಮಹಿಳೆಯರಿಗೆ ಮಾತ್ರ!) ವಿಮೆನ್ಸ್ ಕಾಲೇಜಿನ ಗೇಟೆಂಬ ರೈಲ್ವೆ ಹಳಿ ದಾಟುವಾಗ ಸ್ವಲ್ಪ ಅಳಕುತ್ತಲೇ ಒಳ ನಡೆದೆ. ಇನ್ನೇನು ಗಾರ್ಡ್ ರೂಮು ದಾಟಿ ಕಾಲೇಜಿನ ಮುಖ್ಯದ್ವಾರ ಪ್ರವೇಶಿಸಬೇಕು ಅನ್ನೋಷ್ಟರಲ್ಲಿ ಹಿಂದುಗಡೆಯಿಂದ "ಖಬರ್ದಾರ್ ಅಗರ್ ಅಂದರ್ ಗುಸ್ಸ್ನೇಕಿ ಹಿಮ್ಮತ್ ಕಿಯೇ ತೋ" ಎಂಬಂತೆ ರಾಣಾ ಎಂಬ ಗಿಡ್ಡನೆಯ ಆಕೃತಿಯೊಂದು ಬೆನ್ನಿಗೆ ಪಿಸ್ತೋಲ್ ಮಾದರಿಯಾಗಿ ಬಡಿಗೆವೊಂದನ್ನು ಹಿಡಿದು ಹ್ಯಾಂಡ್ಸ್-ಅಪ್ ಎಂದ. ಮೊದಲೇ ಅಲ್ಲಲ್ಲಿ ನಿಂತು ಹೇಗೆ ಎ(ಹೆ)ದುರಿಸಬೇಕು ಎಂದು ತಾಲೀಮು ಮಾಡಿಕೊಂಡು ಬಂದಿದ್ದ ನಾನು ಏಕ್-ದಂ ಜೇಮ್ಸ್-ಬಾಂಡ್ ತೆರನಾಗಿ ಉದ್ದೇಶ ಪೂರಕವಾಗಿ ಚಟೀರನೆ ಇಂಗ್ಲಿಷ್ನಲ್ಲಿ ಹಿಂಗಿಂಗೆ ಹಿಂಗಿಂಗೆ ಅಂತ ಗುಂಡು ಹೊಡೆದು "ಮೈ ಯಹಾ ಸರ್ಕಾರ್ ಕ ನಮಕ್ ಖಾನೆ ಆಯಾ ಹ್ಞೂ" ಎಂದೆ. ಅದಕ್ಕೆ ಆತ ಅಪಾದಮಸ್ತಕವಾಗಿ ಒಮ್ಮೆ ಸ್ಕ್ಯಾನ್ ಮಾಡಿ ಸ್ವಲ್ಪ ನಾಚಿ-ನೀರಾಗಿ "ಟೀಕ್ ಹೈ ಸರ್ ಆಪ್ ಜಾಯಿಯೇ" ಎಂದ. ಆರಂಭದ ತರಗತಿಗಳಲ್ಲಿ ನನ್ನ ಸ್ಥಿತಿ ಮತ್ತು ಗತಿ ಹೇಳತೀರದು. ನನ್ನ ಬ್ರೋಕನ್-ಹೈದರಾಬಾದಿ ಹಿಂದಿಯುಂ ಕಡಲೋಪಾದಿ ವಿದ್ಯಾರ್ಥಿನಿಯರ ನಗೆಯುಂ!

ಇಂಥ ಸ್ಥಿತಿಯಲ್ಲಿ ಮೂರು ಡಿಗ್ರಿ ಸೆಲ್ಸಿಯಸ್ ತಾಪಮಾನ ಇದೊಂಥರ ಅ(ಹ)ವಮಾನವಾಗಿ ಪರಿಣಮಿಸಿ ನನ್ನ ಕಾಲ್ ಬೇರಿಲಿನ ಸಂದಿಯನ್ನು ಸೀಳಿ ಬಿಟ್ಟಿದ್ದು ಅಲ್ಲದೆ ಗೃಹ ದಿಗ್ಭಂದನ ಹಾಕಿತು. ಜೊತೆಗೆ ಜನವರಿ ಒಂದರಿಂದ ಟೀಚರ್-ಇನ್-ಇನ್ಚಾರ್ಜ್ ಎಂಬ ಅಧಿಕ ತಲೆ ನೋವು ಕೊಟ್ಟು ಗಹಗಹಿಸಿದ ನನ್ನ ಹಿರಿಯರು "ನಾಚ್ ಬಸಂತಿ ನಾಚ್' ಎಂಬಂತೆ ಉರುಳಾಡಿ ಆನಂದಿಸಿದ್ದು ಆಯಿತು.
ಚಳಿಯೆಂದರೆ ಬರೀ ಧಾರವಾದದಲ್ಲಿದ್ದು ಅನುಭವಿಸಿದ್ದ ನನಗೆ ಅಲ್ಲಿಯ 'ದೈಯಾಲ ಕೋಟ' ದಂತಹ ಕರ್ನಾಟಕ ಕಾಲೇಜು ಮತ್ತು ವಿಶ್ವವಿದ್ಯಾಲಯ ಹಂಚಿಕೊಳ್ಳಬಹುದಾದ ನೆನಪುಕೊಟ್ಟದ್ದು ನಿಜ.ಆದರೆ ಮೊನ್ನೆ ದೆಹಲಿ ಚಳಿ ಮಾತ್ರ ನಡುಗಿಸಿದ ಪರಿ ಅ-ಪೂರ್ವ, ಅನನುಭವ. ಕಳೆದ ಡಿಸೆಂಬರ್ ನಲ್ಲಿಯೇ ಮುಗಿಯ ಬೇಕಿದ್ದ ಪರೀಕ್ಷೆಗಳು ದೆಹಲಿ ವಿ.ವಿ.ಯ ವಿಜ್ಞಾನ ಶಿಕ್ಷಕರ ಸೆಮಿಸ್ಟರ್ ರದ್ಧತಿ ಮುಷ್ಕರದಿಂದಾಗಿ ಈಗ ನಡೆಯುತ್ತಿವೆ. ಬರೀ ಕೋಣೆ ತಪಾಸಣೆ ಇಲ್ಲ ಮೇಲ್ವಿಚಾರಣೆಗೆ ಬರುವವರಿಗೆ ನರನಾಡಿಯ ಬಿಗಿದು ಹಾಕುವ ಚಳಿಯ ಖದರ್ ತಿಳಿಯದು. ಪೆನ್ನು ಹಿಡಿದು ಉತ್ತರಗಳ ಕತ್ತರಿಸುವ ಅನುಭವ ವಿದ್ಯಾರ್ಥಿಗಳಿಗೆ. ಇಡಿ ದೇಹವನ್ನು ಉಣ್ಣೆ-ಸ್ವೆಟರ್ ಗಳಿಂದ ಬಿಗಿದುಕೊಂಡು ಬಂದು ಎಕ್ಸಾಮ್ ಹಾಲಿನಲ್ಲಿ ಕೈ-ಕವಚ ಕಳಚಿದೊಡನೆ ಬೆರಳುಗಳೆಲ್ಲ ಜೋಮು ಹಿಡಿದು 'ಮೆಮೊರಿ ಲಾಸ್' ಎಂಬ ಅನುಭವ ಆಗದೆ ಇರದು.

ಓದಿದ್ದರು ಇದನ್ನು ಓದಿಲ್ಲ ಎಂಬುದು ಸಿರಿಯಸ್ ಸಿನ್ಸಿಯರ್ ವಿದ್ಯರ್ಥಿಗಳದ್ದಾದರೆ ಇನ್ನು ಓದಿರದಿದ್ದರೂ ಪರೀಕ್ಷೆಗೆ ಅಷ್ಟೇ ಸಿರಿಯಸ್(!) ಆಗಿ ಪ್ರಿ-ಪೇರಾಗಿ ಬಂದಿದ್ದ ವಿದ್ಯಾರ್ಥಿನಿಯರ ಚೀಟಿ ಗಳೆಂಬ ಸಮಕಾಲಿನ ಸಣ್ಣ ಸಣ್ಣ ತಾಮ್ರ ಪಟದ ಮಾದರಿಯ ಶಿಲಾಶಾಸನಗಳೆನಾದರು ಸಿಗಬಹುದೇ; ಅವುಗಳ ರಚಿಯಿತರ ವಂಶಾವಳಿ ಏನಾದರು ಪತ್ತೆಯಾಗಬಹುದೇ ಎಂದು ಉತ್ಕನನ ಗೈದ ಕೆಲ ಲೇಡಿ-ಟೀಚರ್ಸ್ ಭೂತ-ಗನ್ನಡಿ ಹಿಡಿದು ಮಾಹಿತಿ ಹಕ್ಕು ಚಲಾಯಿಸಿದ್ದು ಇದೆ. ಇನ್ನು ಇಲ್ಲಿನ ಆಸಕ್ತಿಕರ ಸಾರ್ವಜನಿಕ ಸಂಗತಿಗಳಲ್ಲಿ ಬಸ್ಸು ಪ್ರಮುಖ . ಏಕೆಂದರೆ ಹೆಚ್ಚಾಗಿ ಇಲ್ಲಿ ನಾವು ಹೊರಡಬೇಕಾದ ಅಥವಾ ಇಳಿಯ ಬಯಸುವ ನಿಲ್ದಾಣದ ಬದಲಾಗಿ ಪ್ರಯಾಣದ ದರವನ್ನಾಧರಿಸಿ ಟಿಕೆಟ್ ಕೊಡುವುದು. "ಪಾಂಚ್ ಕ ದೋ" "ದಾಸ್ ಕ ತೀನ್ ದೋ .." ಎಂಬದು ಚಾಲ್ತಿಯಲ್ಲಿದೆ. ಹಾಗೆಯೇ ಕಂಡಕ್ಟರ್ ಮಹಾಶಯರು ಒಮ್ಮೆ ಬಸ್ ಹತ್ತಿ ತಮ್ಮ ಸೀಟಿಗೆ ಮೊಳೆ ಜಡಿದು ಕೊಂಡರೆಂದರೆ ಅಲ್ಲಿಂದ ಏಳುವುದೇ ಇಲ್ಲ. ಸ್ವತಃ ಪ್ರಯಾಣಿಕರು ಅವನಲ್ಲಿಗೆ ಹೋಗಿ ಮಲ್ಲ ಯುದ್ಧಮ್ ಗೈದು ಪಡೆದು ಕೊಳ್ಳಬೇಕು. ಇದರಲ್ಲಿ ಬಹಳ ಸಲ ಮುದುಕರು ಮತ್ತು ಮಹಿಳೆಯರು ಯುದ್ಧದಲ್ಲಿ ಶರಣಾಗಿ ನಿಲ್ದಾಣ ಬಂದೊಡನೆ ಇಳಿದು ಹೋಗೋದು ಸಹಜ.

ಕೆಲವೊಮ್ಮೆ ಹೀಗಾಗಿ ಬಿಡುತ್ತದೆ, ನಮ್ಮೂರ ಕಡೆ ಮಾರೆಮ್ಮನ ಗುಡಿಗೆ ಬಳಿಯುವ ಜಾಜಿ ಬಣ್ಣದಷ್ಟೇ ಮಂದವಾಗಿ ಲಿಪ್ಸ್ಟಿಕ್ ಮೆತ್ತುವ ಸಂಪ್ರದಾಯ ನೂಕು ನುಗ್ಗಲಿಗೆ ಅವರಿವರ ಬಟ್ಟೆಯ ಮೇಲೆ ಯಾರಯಾರದೋ ಅದರ ಲಾಂಛನವು ವೀರಾಜಮಾನವಾಗಿ ಮುದ್ರಿಸುವಂತೆ ಮಾಡಿಬಿಡುತ್ತದೆ. ಇದಕ್ಕೆ ಮೆಟ್ರೋ ಕೂಡ ಹೊರತಲ್ಲ. ಸ್ವಭಾವ ಸ್ವಲ್ಪ ರಾಯಳಸೀಮೆಯದು ಎನಿಸುವ 'ದುಡಿಯುವ ವರ್ಗ'ದ ಮಾತು ತೋಡ ಬಿರುಸಾದರು ಬಹು ಬೇಗ ಅತ್ಮಿಯರಾಗಿಬಿಡುತ್ತಾರೆ. ಇನ್ನು ಕಡ್ಡಾಯವಾಗಿ ನಗರಗಳಿಗೆ ಮಾತ್ರ ಎಂಬಂತೆ ಇಲ್ಲೂ ಕೂಡ ಚಿಲ್ಲರೆ ಜೇಬುಗಳ್ಳರು, ಸೂಟ್ ಕೇಸ್ ಕಳ್ಳರು ಇತ್ಯಾದಿ ಇದ್ದೆ ಇದ್ದಾರೆ. ಆಟೋ ರಿಕ್ಷಾ ಡ್ರೈವರ್ ಗಳ ಬಗ್ಗೆ ಒಳ್ಳೆ ಮಾತೆ ಇವೆ. ಆದರೆ ಪ್ರತಿ ಆಹಾರದಲ್ಲೂ ಆಲೂಗಡ್ಡೆಯನ್ನು ಉಪ್ಪು ಬಳಸಿದಂತೆಯೂ ಕೆಲವೊಮ್ಮೆ ನೀರು ಬಳಸಿದಂತೆಯೂ ಇರುವ ಇಲ್ಲಿನ ಅಡುಗೆ ಮಾತ್ರ ದಕ್ಷಿಣಾದಿಗಳಿಗೆ ರೊಂಬ ರೇಜಿಗೆ ತರದೇ ಇರದು. ಇನ್ನು ಕೊಂಚಂ ತೆಲುಗು; ಕೊಂಚಂ ತಮಿಳ್ ತಿಳಿದಿದ್ದರಂತೂ ಮಲ್ಲು ಹೋಟೆಲ್ ಸೇರಿದಂತೆ ತಮಿಳ್ ಕ್ಯಾಂಟೀನ್ ಗಳಲ್ಲಿ ಇಡ್ಲಿ ವಡೆ ಜೊತೆ ಸ್ವಲ್ಪ ಚಟ್ನಿ ಸಾಂಬಾರ್ ಅಧಿಕವಾಗಿ ದೊರಕುವುದು ಖಚಿತ.

'ಉಳ್ಳವರು ಉಲನ್ ಕೊಳ್ಳುವರಯ್ಯ, ಇಲ್ಲದವರು ನಾವೇನು ಕಮ್ಮಿ ಅಯ್ಯಾ, ಸೀರೆಯೇ ಸ್ವೆಟರ್; ಶಾಲೆ ಮಫ್ಲರ್' ಎಂದು ಚಳಿಯಿಂದ ರಕ್ಷಿಸಿಕೊಳ್ಳಲು ಫುಟ್-ಪಾತ್ ಗೆ ಬರುವ ಮಕ್ಕಳು ಲಾಲ್ ಬತ್ತಿ (ಟ್ರಾಫಿಕ್ ಸಿಗ್ನಲ್)ಗಳಲ್ಲಿ ಓಡಾಡುವ ವಾಹನಗಳ ವೇಗವನ್ನು ಲೆಕ್ಕಿಸದೆ ಚಿರಂಜಿವಿಗಳಂತೆ ಮಂಜನ್ನು ಭೇದಿಸಿ ಕಾರುಗಳ ಕಿಟಕಿಗಳಿಗೆ ಮುಖವಿಟ್ಟು ಬೇಡುವ ದೃಶ್ಯ ಕನ್ನಡಿಗಳನ್ನು ವೈಬರ್ ತೊಳೆದು ಹಾಕಿದಷ್ಟೇ ನಿಚ್ಚಳ.

2010-07-15T23:23:00.000-07:00

ದುಃಖ ದಾಖಲಿಸುವವನೆ ಇದನ್ನು ಬರೆದಿಟ್ಟುಕೊ !

2009-07-17T05:44:00.000-07:00

ಕಟಕಟೆಯ ಕಿತಾಬಿನ ಹಾಳೆ ನಿನ್ನವು

ಹಿಡಿದ ಲೇಖನಿಯ ಶಾಯಿಗೂ ನಿನ್ನ ರಕ್ತದ ಗುಣ

ಇನ್ನು ತೀರ್ಪು ನಿನ್ನಿಚ್ಚೆಯಂತೆ ಬರೆದುಕೊಂಡಲ್ಲಿ

ಪ್ರತಿ ಸಲ ನಾನೇಕೆ ಆಶ್ಚರ್ಯಪಡಲಿ

ತಮಾಷೆಯೆಂದರೆ ಇಷ್ಟು ಹೇಳಲೂ ನಿನಗೆ

ಭದ್ರತೆ ಬೇಕು; ನನಗೋ ತುಕ್ಕು ತಕ್ಕಡಿಯ ಕೆಳಗೆ

ಪುಕ್ಕಲು ಆಯಸ್ಕಾಂತದ ನೆನಪು!

ಅದಕ್ಕೆ ಸದಾ ಹಾಲುಗಲ್ಲದ ಮೇಲೆ ನಳಿಕೆಯಿಡುವ

ನಿನ್ನ ಆದೇಶಗಳು ಎಂದೋ ಖಚಿತಪಡಿಸಿವೆ

ನನ್ನ ನಗುವಿನೆಡೆಗಿನ ನಿನ್ನ ಅವಿರತ ಗುರಿ

ದುಃಖವನು ಬರಿ ಇಮ್ಮಡಿಗೊಳಿಸುವುದೆಂದು!

ನೀನು ಕಿರುಚುವಷ್ಟು ಸಾರಿಯೂ ಮುಂದುವರೆಸುತ್ತೇನೆ

ಕಪ್ಪು ಹಲಗೆಯ ಮೇಲೆ ಆಕಾಶ ಬರೆದಿದ್ದು ನಾನೇ ; ಮತ್ತು

ನನಗೆ ಗೊತ್ತಿರುವುದು ಬರಿ ನಿಜವೆಂಬುದನು!

ಮೈದಾನಗಳು ಧಿಕ್ಕರಿಸಿದವನ ಪಾಪದ ಹೆಸರು

ಕಡಲ ಅಲೆಗಳ ಮಾತು ಬಿಡು ಮೊದಲಿನಂತೆ

ಮರೆವಿನ ಖಯಾಲಿ ಅವಕ್ಕೆ; ಆದರೆ ಈ ಸಲ

ಜಗದ ಎಂಥ ಕಲ್ಲಿನ ಮೇಲಾದರೂ ಕೆತ್ತಿಸು

ಸಿಕ್ಕ ತುಫಾಕಿಯ ಮೇಲಿನ ಬೆರಳ ನಿಶಾನೆ

ಕೇವಲ ಮೂರುವರ್ಷದ ನನ್ನದೇ ಎಂದು!

____________________________________________________

ಇತ್ತೀಚಿಗೆ ಜಿಂಬಾಬೆ ರಕ್ಷಣಾ ಪಡೆಯಿಂದ ಅಕ್ರಮವಾಗಿ ಬಂಧಿಸಲ್ಪಟ್ಟ "ಮೆಂಬರ್ಸ್ ಫರ ಡೆಮೊಕ್ರಟಿಕ್ ಚೇಂಜ್ ಮಾನವ ಹಕ್ಕುಗಳ ಸಂಘಟನೆಯ ದಂಪತಿಗಳ ಮೂರು ವರ್ಷದ ಮಗು ನಿಜೆಲ್ ಮೂಟೆ ಮಗೌ ನನ್ನು ಅಲ್ಲಿಯ ನ್ಯಾಯಾಲಯ ಅಪರಾಧಿಯೆಂದು ಗಣಿಸಿ ಮೂರು ತಿಂಗಳು ಜೈಲು ವಾಸ ನೀಡಿತ್ತು. ಮತ್ತು ಇದೀಗ "ಪ್ರಪಂಚದ ಅತಿ ಕಿರಿಯ ಉಗ್ರಗಾಮಿ " ಎಂಬ ಹಣೆ ಪಟ್ಟಿ ಹಚ್ಚಿತ್ತು. ಆದರೆ ಶಿಕ್ಷಾವಧಿ ಮುಗಿಸಿ ಮನೆ ಸೇರಿದ್ದರೂ ಮಾನಸಿಕವಾಗಿ ಜರ್ಜರಿತವಾದ ಮಗು ಸಹಜ ಸ್ಥಿತಿಗೆ ಬಂದಿಲ್ಲ. ನಗುವುದಿಲ್ಲ, ಅಪರಿಚಿತರು ಬಂದರೆ ದಾವಿಸಿ ಅಮ್ಮನ ಹಿಂದೆ ಅಡಗಿಕೊಳ್ಳುವುದಾಗಿ ವರದಿಯಾಗಿದೆ.

ನುಡಿಸಲಾರೆನು ಮತ್ತೇರದೆ ಕೊಳಲು!

2009-06-05T01:25:00.000-07:00

ನಿನ್ನ ಗೈರುವಿನಲ್ಲಿ ನಾನು ನಿಶ್ಚಲ ಬರಿ ತೊಟ್ಟಿಲು
ಉಟ್ಟುಡುಗೆಯ ತುಂಬ ಚಿತ್ತಾರದ ಮಧು ಬಟ್ಟಲು!

ಕೊಕ್ಕರೆಗೆ ಕಾಲು ಸೋತಿಲ್ಲ ನೀರಿನಿಂದ ಹೊರಬೀಳಲು
ಮೀನಿಗೊ ಮನಸಿಲ್ಲ ಕಾಡು ಕದ್ದು ಮುತ್ತಿಡಲು!

ಎಣ್ಣೆ ತುಪ್ಪ ಹಾಲು ಜೇನೆಲ್ಲ ನೆತ್ತಿಯಿಂದೆರೆಯಲು
ದೇವರು ಕೂಡ ನಾಲಗೆ ಚಾಚುತ್ತಿಲ್ಲ ರುಚಿ ನೋಡಲು!

ಕಳೆದಿರುಳಿನಿಂದ ನೀನಿಲ್ಲ ಸಾಕಿ ಮೊಗೆದು ಕೊಡಲು
ಮತ್ತೇಗೆ ನುಡಿಸುವುದು ಮತ್ತೇರದೆ ಕೊಳಲು!

ತಾರೆಗಳ ಆರಿಸಿದ ಜಿಪುಣ ದೇವರು!

2009-06-05T00:49:00.000-07:00

ಎದೆ ತುಂಬ
ಹಣತೆ ಹಚ್ಚಿಟ್ಟೆ
ನಾಳೆಗೆ ನೀಲಿ ಆಕಾಶದಿ
ಆ ಜಿಪುಣ ದೇವರು
ತಾರೆಗಳ ಆರಿಸುವುದನರಿತು!
ಕದವಿಕ್ಕಿ ಗಾಳಿ ಬಚ್ಚಿಟ್ಟೆ
ಓ ಮಂದಾರ ಸ್ಪರ್ಷಿತ ದೂಳೆ
ಹಾಯುವುದಾದರೆ ಈ ಕಡೆ
ಸ್ವಲ್ಪ ಬೇಗನೆ ಹೊರಡುವುದೊಳಿತು
ಇಲ್ಲ ಅರಣ್ಯಗಳ ಸಾಮೂಹಿಕ ಹತ್ಯೆಗೆ
ಆಜ್ಞಾಪಿಸಬಹುದು
ಆ ಕೊಲೆಗಡುಕನಿನ್ನು !

ಜಾರಿಬಿದ್ದಿದ್ದು ಯಾವ ದಿಕ್ಕಿಗಿ ಹೇಳು ಖರೆ !

2009-06-04T10:15:00.000-07:00

ಹನಿ ಮುಡ್ಯಾವ ಖರೆ
ದನಿ ಕಾಡ್ಯಾವ ಖರೆ
ಆದ್ರ... ಈ ನಗಿಡ್ಯಾಗ ನೆಪ್ಪಾಗೊ
ಆ ಹಾಡು ಯಾರದು ಹೇಳು ಖರೆ!

ಹೂವು ದಿನಾ ಬಿಡ್ತಾವ ಖರೆ
ನೋಡೋರ ಕೈಮಾಡಿ ಕರಿತಾವ ಖರೆ
ಆದ್ರ... ಜಡಿಗೆ ಮುಡಿದಿದ್ದು
ಯಾರ ಹೆಸರಲೆ ಹೇಳು ಖರೆ!

ಹಕ್ಕಿ ತೆಲ್ಯಾವ ಖರೆ
ಮತ್ತ ಗೂಡಿಗೆ ಹೊಂಟಾವ ಖರೆ
ಆದ್ರ... ಎದಿವಳಗ ಬಚ್ಚಿಟ್ಟ
ಗುಟ್ಟು ಯಾರದು ಹೇಳು ಖರೆ !

ನೆನಪು ಬರ್ತಾವ ಖರೆ
ನಗು ಬರ್ಸ್ತಾವ ಖರೆ
ಆದ್ರ...ಜೀವ ಹಿಂಡಿದ್ದು
ಯಾರು ಹೇಳು ಖರೆ!

ದು:ಖ ಆಗ್ತಾದ ಖರೆ
ಅಳು ಉಕ್ಕಿ ಬರ್ತಾದ ಖರೆ
ಆದ್ರ...ಕಣ್ಣಾಗ ನಿಂತಾವ
ಚೆಲುವ ಯಾರು ಹೇಳು ಖರೆ!

ಕನಸು ಬಿಳ್ತಾವ ಖರೆ
ಎಲ್ಲೆಲ್ಲೊ ಹೊಯ್ತಾವ ಖರೆ
ಆದ್ರ... ನೀ ಕುಂತಿದ್ದು
ಯಾರ ಕುದರೆ ಮ್ಯಾಲ ಹೇಳು ಖರೆ!

ಚುಕ್ಕಿ ಹೊಳ್ದಾವ ಖರೆ
ಬೆಳಕ ತಳ್ದಾವ ಖರೆ
ಆದ್ರ...ನೀ ಜಾರಿ ಬಿದ್ದಿದ್ದು
ಯಾವ ದಿಕ್ಕಿಗಿ ಹೇಳು ಖರೆ!

ಅಪ್ರಕಟಿತ ವದಂತಿ

2009-06-04T09:30:00.000-07:00

ಎದೆ ಪುಟದಲ್ಲಿ

ಸಣ್ಣ ವರದಿಯಷ್ಟಿದ್ದ

ನಮ್ಮ ಒಲವನು

ಮಡಚಿ ಕಸದ ಬುಟ್ಟಿಗೆ

ಎಸೆದದ್ದು ನಿನಗೂ ಗೊತ್ತು

ಖರೀದಿಗಿಟ್ಟಿಲ್ಲವಾದರು

ಕೇಳುವರು ಪ್ರತಿಯೊಬ್ಬರೂ

ಪ್ರತಿಗಳಿಗಾಗಿ ಪ್ರತಿದಿನ

ಸಿಕ್ಕಲ್ಲೆಲ್ಲ ಅದರದೇ ಸುದ್ದಿ

ನಿನ್ನ ಗೈರುವಿನಲ್ಲಿ

ಅದೊಂದು ಅಪ್ರಕಟಿತ

`ಅಪವಾದ' ಎಂದಿದ್ದೆನಷ್ಟೇ

ಆಶ್ಚರ್ಯವೆಂದರೆ ಅದೀಗ

ಸಿಕ್ಕ ಸಿಕ್ಕವರ ನಾಲಗೆಯಲಿ

ಅಕ್ಷರವಾಗಿ ; ಅದ್ಯಾವನೋ

ತಮಟೆಯಲಿ ಅಚ್ಚಾಗಿ

ಹೇಗೆ ಮುಸಿ-ಮುಸಿ ನಗುತಿದೆ ನೋಡು

ಮುಖಪುಟದಲ್ಲಿ ವದಂತಿಯಾಗಿ!

ಅ-ಕಾಲ ಮೊರೆ

2009-06-04T08:34:00.001-07:00

ಕಾಲ ಜ್ಞಾಪಕಕ್ಕೆ

ನಕ್ಷತ್ರ ಜಾರಿದಂತೆ

ಎಲ್ಲಾ ವಸಂತಗಳು

ಮಣ್ಣು ಪಾಲಾದವು

ಎಂದು ಕೊಂಡವನು

ಭೂಮಿ ತುಟಿ ಸೀಳಿ

ಹೊರಬಂದ ಚಿಗುರು

ಆಕಾಶಕ್ಕೆ ಮುತ್ತಿಡುವುದನು

ಕಂಡು ಮತ್ತೆ ಹಿಂದಿರುಗಿದೆ

ಅವಳ ಚಳಿಗಾಲದ ಮನೆ ಹಿತ್ತಲಿಗೆ

ಇನ್ನೊಂದು ಸಂಜೆಗೆ

ಅಗ್ಗಷ್ಟಿಕೆಯೆದುರು

ಸ್ವಲ್ಪ ಜಾಗ ಕೇಳಿ!

* ** *

ಕಂಕುಳಲ್ಲಿ

ಗಂಟು ಹಿಡಿದು

ಕಾಡು ಪಾಲಾದ

ಓಣಿ ಮುದುಕಿ

ಗೊಣಗಿಕೊಳ್ಳುತ್ತಾ

ನಡೆದಂತೆ

ಮಾತನಾಡುವವನಿಗೆ

ಪ್ರಶ್ನೆ ಬರೆದುಕೊಟ್ಟು

ಹೊರಟೆ ಬಿಟ್ಟಿರಿ ನೀವು

ಪ್ರತಿ ಸಲ

ಹುಣ್ಣಿಮೆ ಹಿಂದಿನ ರಾತ್ರಿ

ಬಂದ ತಲೆ ನೋವು

ಹೋದದ್ದು ತಿಳಿಯದಂತೆ

ಹೋಗೆ ಬಿಟ್ಟಿರಲ್ಲ ನೀವು!

ಗುಟ್ಟಿನಿಂದ ಗುಲ್ ಮೊಹರ್ ಗೆ

2009-06-04T08:34:00.000-07:00

ಮೈನೆರೆದ ಮೊಗ್ಗೊಂದು
ಚಳಿ ಕೊಡವಿ ಮೆಲ್ಲನೆ ಕಿಟಕಿಯಾಚೆಗೆ
ರಸ್ತೆ ಹುಡುಗರ ಕಂಡು ಕಣ್ಬಿಟ್ಟ ಮುಂಜಾವು
ನಡು ವಯಸ್ಸಿನ ನೀಲಿ
ಎಲೆ ಜಗಿದು ; ನೆಲಕುಗಿದ ಹೊತ್ತು
ಸಂಜೆ ಇಲ್ಲೇ ಅಂತೆ ಸೂರ್ಯನ ಸಾವು!

ಗುಬ್ಬಿ ಎದೆಯೊಳಗೆ ಹಾಡು ಕಟ್ಟಿದ ಗಳಿಗೆ
ಗುಟ್ಟಾಗಿ ಊರಾಚೆ ಸಂತೆಯಲ್ಲಿ
ನೆಗೆ-ನೆಗೆದು ಕುಣಿಯಿತು
ಗಿಡದ ಬುಡದಲ್ಲಿ ಕೆಂಪು ತುರುಬಿನ ಹುಂಜ!

ಗಗನ ಮರ ಹಂದರದಡಿ
ಗಾಳಿ ಲಾಲಿಗೆ ತಲೆದೂಗಿ
ಜೋಲಿಗೆಯಲೂ ನಗುವ ಮಗು ತಾನು
ಬಚ್ಚಿಡದ ಬಯಲು ತಾಯಿ
ಮುಟ್ಟೆಂದರೆ ನೆಲದ ಮರುಹುಟ್ಟುಯೆಂದ
ಮರುದಿನದ ನೋವು ಈ ಗುಲ್ ಮೊಹರ್ ಹೂವು!

ನೂರೆಂಟು ನಕ್ಷತ್ರ ಒಬ್ಬಂಟಿ ಆಕಾಶ

2009-06-04T08:12:00.000-07:00

ಅವನ ಕೈಜಾರಿ ನೆಲ ಸೇರಿದ ಬಳಿಕ ಒಬ್ಬಂಟಿ ನಾನು

ವಂಚಕ ಒಬ್ಬಂಟಿತನದಲ್ಲು ಪ್ರಾಮಾಣಿಕ ಒಬ್ಬಂಟಿ ನಾನು

ಅನವಶ್ಯಕ ಯಾರ ಸಹಿ; ಮುದ್ರೆ ಕತ್ತಲೆಗೆ ಮತ್ತು ನಿದ್ರೆಗೆ

ಕನಸುಗಲೆದ್ದು ಹಾಸಿಗೆ ಮಡಚುವ ತನಕ ಒಬ್ಬಂಟಿ ನಾನು

ಹಸಿವು ನಗು ಮತ್ತು ಮೈಥುನ ಯಾರಪ್ಪಂದಿರ ಸ್ವತ್ತಲ್ಲ

ಈಗಷ್ಟೇ ಈ ಬಟ್ಟೆ ಬಡಿವಾರ ಬಿಸಿನೀರ ಜಳಕ ಒಬ್ಬಂಟಿ ನಾನು

ಮಲಗಿದವರ ಮಧ್ಯೆ ಎದ್ದು ಕಣ್ಬಿಟ್ಟೆ ಸುತ್ತಲೂ ಸುಡುಗಾಡು

ನಡು-ನಡುವೆ ಗೊರಕೆ ಮತ್ತೆ ಆಕಳಿಕೆ ಎದೆ ತುಂಬ ನಡುಕ ಒಬ್ಬಂಟಿ ನಾನು

ತೊಗಟೆ ರೆಪ್ಪೆಗಳ ಇಷ್ಟಿಷ್ಟೇ ಕಳಚಿ ಬಿಗಿದ ಭುವಿಯ

ತೋಳ ಸಡಲಿಸಿ ಆಕಾಶ ದಿಟ್ಟಿಸುವ ತವಕ ಒಬ್ಬಂಟಿ ನಾನು

ಗತವೆಲ್ಲ ಶವದ ಮಲ್ಲಿಗೆಯಂತಿದ್ದರೆ

2009-06-04T07:06:00.000-07:00

ಯಾವ ಉರಿಯ ದೀಪದ ಬೆಳಗು

ಎಂಥ ಎದೆಗಳ ಸುದುವುದೋ ತಿಳಿಯದೆ

ನೀನು ಮಾತ್ರ ನೋಡಬಲ್ಲ

ಸ್ಥಿತಿಯಲ್ಲಿದ್ದ ನನ್ನನ್ನು

ಯಾರೋ ತಾಕಿದಂತೆನಿಸಿ

ನೆಲವಪ್ಪಿಕೊಂಡ ಮೊಂಬತ್ತಿ ಹೊತ್ತಿಸಿದೆ

ನಡುಗುವ ಜಾವದ ಚಳಿಗೆ

ನಗರದ ಕಾರ್ಖಾನೆ ಚಿಮಣಿ

ನಿನ್ನ ನೆನಪ ಹೋಗೆ ಹೊರಚೆಲ್ಲಿದಂತೆ

ಬಿದ್ದ ಶಾಪದ ಮಳೆ ಎದುರು

ದು:ಖದ ಬಿಕಾರಿಯಾದೆ

ಚಾಚಿದ ಬೊಗಸೆ ಬಟ್ಟಲು ತುಂಬ

ಅಂದುಕೊಂಡಂತೆ ನೀನು

ಬರಿ ಆಲಿಕಲ್ಲನೆ ಸುರಿದೆ ; ಆದರೆ

ನಾನಿಲ್ಲಿ ಮೌನದ ಅಬ್ಬರವನ್ನು

ಅನುಮಾನಿಸುತ್ತಲೇ ಬಾಡಿಗೆ ಮನೆ ಹಿಡಿದೆ !

ಹೀಗೆ ನನ್ನ ಸ್ಮೃತಿಪಟಲದಲ್ಲಿ

ನಿನ್ನ ಕಣ್ಣಿನ ಚಿತ್ರ ಉಳಿದುಬಿಟ್ಟಿದ್ದೆ ಬೇರೆ

ಜಗದ ನೂರು ಕಣ್ಣಿನ ಅಲ್ಬಂ ಅದನು

ಬರೆದುಕೊಂಡಿದ್ದೆ ಬೇರೆ !

ಯಾವುದು ಏನಾದರು

ಗಾಯವನ್ನು ಮತ್ತಷ್ಟು ಹಸಿಯಾಗಿಸುವಂತಿದ್ದರೆ

ನನಗೆ ಅಂಥ ನೆನಪುಗಳೇ ಬೇಡ

ಗತವೆಲ್ಲ ಗೋರಿಯೊಳಗಿನ

ಶವದ ಮಲ್ಲಿಗೆಯಂತಿದ್ದರೆ

ನನಗೆ ಅಂಥ ಸುವಾಸನೆಯೇ ಬೇಡ!

ಸಭ್ಯತೆಯ ಅರ್ಥ ಹುಡುಕಿ

2009-06-04T05:04:00.000-07:00

ಸಭ್ಯರೊಳಗೆ
ಸಭ್ಯನಾಗಿ

ಸಭ್ಯತನವನು ಮೆರೆಯದ

ನಿನ್ನ ಸಭ್ಯತೆಯನು

ಯಾವನೋ ಅಸಭ್ಯ

"ಆಹಾ ..ಏನ್ ಸಭ್ಯತನ"

ಎಂದೊಡನೆ ಮತ್ತಷ್ಟು

ಕುಗ್ಗಿ ; ಕಿರಿದಾಗುವ

ನಿನ್ನ ಅಸಭ್ಯತನಕೆ

ಯಾವನೋ ಅಸಭ್ಯ

"ಛೆ ಏನ್ ಅಸಭ್ಯ ರೀ ಥೂ"

ಎಂದೊಡನೆ ಮತ್ತಷ್ಟು

ಅಸಭ್ಯನಾಗುವ

ನಿನ್ನ ಅಸಭ್ಯತನಕೆ

ಸಭ್ಯತೆಯ ಅರ್ಥವಾದರೂ ಏನು?

ಕಟ್ಟಿಸಲಾರೆನು

2009-06-04T04:52:00.000-07:00

ಏ ಗೆಳತಿ
ಬಯಸದಿರು
ಮಂಜಿಲ್ ಮಹಲ್ ಗಳ
ಇಟ್ಟಿಗೆ ಸಿಗದ ಈ ತುಟ್ಟಿ
ಕಾಲದಲ್ಲಿ ಕಟ್ಟಿಸಲಾರೆನು
ಗೋರಿ ಗುಮ್ಮಟಗಳ
ಏಕೆಂದರೆ ಅಲ್ಲಿ ನನ್ನ ಜನತೆಗೆ ಇನ್ನು
ಜನತಾ ಮನೆ ಸಿಕ್ಕಿಲ್ಲ!

ಗೂಡಿನ ತುಂಬ ಚಂದ್ರ ಬಿಂಬ
ನಕ್ಷತ್ರ ಎದೆ ತುಂಬ
ಬೆಳದಿಂಗಳ ತಾಕುವ
ಇರಾದೆ ಇದ್ದರೆ ಇಳಿದು ಬಾ
ನನ್ನ ಮನದಾಳದ ಓಣಿಗಳಲಿ
ಗೋಣಿ ಚೀಲಗಳ ಹೊದ್ದ
ಆ ಮಾಂಸ ಮುದ್ದೆಗಳ ಕಂಡೂ
ಬರುವ ಬಯಕೆಯಿದ್ದರೆ
ಜೊತೆಗೊಂದಿಷ್ಟು ಕಣ್ಣೀರು ತಾ !

ಓರಿಸ್ಸಾ: ಇಲ್ಲಿ ಬದುಕು ಯಾರಿಗೂ ಮುಖ್ಯವಲ್ಲ!

2009-04-13T03:47:00.000-07:00

ದೇಶಾದ್ಯಂತ ಮತ್ತೆ ಸರ್ಕಸ್ ಶುರುವಾಗಿದೆ. ಸೊ-ಕಾಲ್ಡ್ ಜನ ಪ್ರತಿನಿಧಿಗಳು ಕಣ್ತುಂಬ ನೀರು ತುಂಬಿಕೊಂಡು ಓಣಿ ವಠಾರ ಗಲ್ಲಿಗೆ ಪಾದಾರ್ಪಣೆ ಮಾಡುತ್ತಿದ್ದಾರೆ. ಹಳ್ಳಿಗಾಡಿನ ಹೆಣ್ಣು ಮಕ್ಕಳ ಹೆರಿಗೆ, ರೋಗ ಉಲ್ಬಣ ಇಲ್ಲ ಹಸಿವಿನಿಂದ ಜನ ಸಾಯುತ್ತಿರುವಾಗ ಪೂರೈಸದ ವಾಹನ ಮತ್ತು ಭದ್ರತಾ ವ್ಯವಸ್ಥೆಯನ್ನು ಮತ ಚಲಾಯಿಸಲು ಮಾತ್ರ ತಪ್ಪದೇ ಒದಗಿಸುವುದಾಗಿ ಸಂಬಂದಪಟ್ಟ ಅಧಿಕಾರಿಗಳು ಹೇಳುತ್ತಿದ್ದಾರೆ. ಮತ್ತು ಜನ ಕೂಡ ಕಳೆದ ಅರವತ್ತು ವರ್ಷದಿಂದ ಇದನ್ನು ಕೇಳಿಸಿಕೊಳ್ಳುತ್ತಲೇ ಬಂದಿದ್ದಾರೆ. ಆದರೆ ಯಾಕೋ ಈ ಸಲ ಕಳೆದ ವರ್ಷ ಕೋಮುವಾದಿಗಳಿಂದ ಹಲ್ಲೆಗೊಳಗಾದ ಒರಿಸ್ಸಾದ ಕೆಲ ಪ್ರದೇಶಗಳ `ಪ್ರಜಾಪ್ರಭುತ್ವ ದೇಶದ ಮತದಾರ ಮಹಾಶಯ' ಮಾತ್ರ ಸರ್ಕಾರಿ ಕ್ಯಾಂಪ್ ಬಿಟ್ಟು ಕದಲುವಂತೆ ಕಾಣುತ್ತಿಲ್ಲ. ಎರಡು ತಿಂಗಳಿಂದ ಸುಮಾರು ನಾಲ್ಕು ನೂರಕ್ಕೂ ಹೆಚ್ಚು ಕುಟುಂಬಗಳು ರಿಲೀಫ್ ಕ್ಯಾಂಪ್ ಗಳು ಮುಚ್ಚಿದ್ದರೂ ಹಳ್ಳಿಗೆ ಮರಳಲು ಭಯಗೊಂಡು ಪಟ್ಟಣದ ಬಯಲು ಪ್ರದೇಶಗಳಲ್ಲಿ ಬಿಡಾರ ಹೂಡಿವೆ. ಇದರಲ್ಲಿ ಹೆಚ್ಚಿನವರು ದಲಿತ-ಕ್ರಿಶ್ಚನ್ನರು ಮತ್ತು ಆದಿವಾಸಿಗಳಿದ್ದಾರೆ. ಸಾವಿನ ನೆರಳಡಿ ಕೂತವರ ಬಿಡಾರಗಳೆದುರು ನಿಂತು ಚುನಾವಣೆಯ ಭಾಷಣ ಬಿಗಿಯುತ್ತಿರುವ ಚಿತ್ರಣ ಮಾತ್ರ ಸ್ವತಂತ್ರ ಭಾರತದ ನಾಚಿಕೆಗೇಡುತನದ ಸ್ಥಿತಿಯಾಗಿದೆ.

ಒಂದು ಹಿನ್ನೋಟ :

ಭಾರತವು ೧೯೪೬ ರವರೆಗೂ ಹೆಚ್ಚಾಗಿ ಜಾತಿಜಗಳಗಳ ಕಂಡಿದೆ. ಹಿಂದೂ-ಮುಸ್ಲಿಂ ಗಲಭೆ ಪ್ರಕರಣಗಳು ಹೊಡೆದಾಟದಲ್ಲಿ ಕೊನೆಗೊಳ್ಳುತ್ತಿದ್ದವು. ಆದರೆ ದೇಶ ವಿಭಜನೆಯ ಸಂದರ್ಭದಲ್ಲಿ ನಡೆದ ಹಿಂಸಾಚಾರ ಮಾತ್ರ ಧರ್ಮದ ಹೆಸರಿನಲ್ಲಿ ಮತಾಂಧರು ಮಾಡಿದ ಸಾಮಾನ್ಯರ ಕಗ್ಗೊಲೆಯೇ ಸರಿ. ಆಧುನಿಕ ಪರಿಕಲ್ಪನೆಯಾದ ಕೋಮುವಾದವನ್ನು ಪ್ರತಿಪಾದಿಸುವವರು ಮಧ್ಯ ಕಾಲಿನ ದಿನಗಳಲ್ಲಿ ನಡೆದ ಘಟನೆಗಳತ್ತ ಬೆರಳು ಮಾಡುತ್ತಾ ಆಗಿನ ಧಾರ್ಮಿಕ ಸಂಸ್ಥೆಗಳು ಅನುಸರಿಸುತ್ತಿದ್ದ ಆಚರಣೆಗಳನ್ನು ತಮ್ಮ ಧ್ಯೇಯಗಳನ್ನಾಗಿಸಿಕೊಂಡು ಸಮರ್ಥಿಸಿಕೊಳ್ಳುತ್ತಿದ್ದಾರೆ. ಮತ್ತು ವಸಚಾಟು ಭಾರತದ ಒಂದು ಕೋಮಿನ ರಾಜಕಾರಣಿಗಳು ಇದನ್ನೊಂದು ರಾಜಕೀಯ ಸಿದ್ಧಾಂತವನ್ನಾಗಿ ಬಳಸಿಕೊಂಡದ್ದು ಈಗ ಇತಿಹಾಸ. ಅದಕ್ಕೆ ಕೋಮುವಾದ ಒಂದು ಸಾಮಾಜಿಕ ನೈಜ ಪರಿಕಲ್ಪನೆಯಲ್ಲದ್ದಿದ್ದರು ಅದನ್ನು 'ಪುನರುತ್ಥಾನ' ವೆಂಬ ಹೆಸರಿನಲ್ಲಿ false consciousness ಬಿತ್ತುತ್ತಿದ್ದಾರೆ ಎನ್ನುತ್ತಾರೆ ಇತಿಹಾಸಕಾರ ಬಿಪಿನ್ ಚಂದ್ರ ತಮ್ಮ Communalism in Modern India ಪುಸ್ತಕದಲ್ಲಿ.

ಪ್ರಾಂತೀಯ ಭಾರತ ಸಮಾಜದ ಯಾವ ನೂನ್ಯತೆಗಳನ್ನು ಗಮನಿಸಿ ಬ್ರಿಟಿಷರು ನಮ್ಮನ್ನು ಆಳಿದ್ದರೋ ಅವೇ ಅಂಶಗಳು ರಾಷ್ಟ್ರೀಯ ಚಳುವಳಿ ರೂಪುಗೊಳ್ಳಲು ಸಹಕರಿಸಿದವು. ಹೀಗಾಗಿ ಭಾರತಕ್ಕೆ ರಾಷ್ಟ್ರೀಯತೆ ಮತ್ತು ಕೋಮುವಾದದ ಪರಿಕಲ್ಪನೆಗಳು ಆಧುನಿಕವೆಂದೆ ಹೇಳಬೇಕು. ಹಾಗೆ ರಾಷ್ಟ್ರೀಯ (ರಾಜಿ?) ಚಳುವಳಿಗೆ ಜನರನ್ನು ಒಗ್ಗೂಡಿಸಲು ಕಾಂಗ್ರೆಸ್ ನ ನಾಯಕರು ಬಳಸಿಕೊಂಡದ್ದು `ಸ್ವದೇಶಿ', `ರಾಷ್ಟ್ರೀಯತೆ' ಮತ್ತು `ಐಕ್ಯತೆ'ಯ ಪರಿಕಲ್ಪನೆಗಳನ್ನೆ. ಆದರೆ ಕರಮಚಂದ ಗಾಂಧೀ ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ ಹಿಂದೂ ಧರ್ಮವನ್ನು (?) ಒಂದು ರಾಷ್ಟ್ರೀಯ ಅಸ್ಮಿತೆಯನ್ನಾಗಿ ಅರ್ಥೈಸಿ ಆ ಮೂಲಕ ಭಾರತದ ಎಲ್ಲ ದಲಿತ ಮತ್ತು ಆದಿವಾಸಿಗಳೆಲ್ಲ ಹಿಂದೂ ಧರ್ಮದ ಭಾಗವೇ ಎಂದು ಘೋಷಿಸಿದರು. ಗಣೇಶ ಚತುರ್ಥಿಯನ್ನು ಸಾರ್ವಜನಿಕ ಆಚರಣೆಯನ್ನಾಗಿ ಪರಿಗಣಿಸಬೇಕೆಂಬ ಬಾಲ ಗಂಗಾಧರ ತಿಲಕರ ಆಶಯ ಕೂಡ ರಾಷ್ಟ್ರೀಯತೆ ಬಿತ್ತುವಿದೆ ಇರಬೇಕು.

ಆದರೆ ರಾಷ್ಟ್ರೀಯತೆ ಯ ಜೊತೆ ಜೊತೆಗೆ ಕೊಮುವಾದವು ಬೆಳೆದ ರೀತಿಗೆ ಮೇಲಿನ ನಾಯಕರು ಪರಿಹಾರ ಹುಡುಕುವಲ್ಲಿ ವಿಫಲರಾದರೆಂದೆ ಹೇಳಬೇಕು. ಏಕೆಂದರೆ ಸ್ವಾತಂತ್ರೋತ್ತರ ಭಾರತದಲ್ಲಿ ಕೋಮುವಾದ ಇಷ್ಟು ತೀವ್ರ ಗತಿಯಲ್ಲಿ ಹರಡಲು ಮುಖ್ಯ ಕಾರಣ ಕನಿಷ್ಠ ಆ ಹೊಸ ರಾಷ್ಟ್ರೀಯತೆ ವರ್ಗ ತನ್ನ ಭಾಷಿಕ-ಸಾಂಸ್ಕೃತಿಕ ಪರಿಕಲ್ಪನೆಗಳನ್ನು ಸಾಮಾನ್ಯ ಜನರಿಗೆ ತಲುಪಿಸದಿರುವಿಕೆ ಮತ್ತು ದಲಿತರೊಂದಿಗಿನ ಜಾತಿ ವ್ಯವಸ್ಥೆ ಬಗ್ಗೆ ಮೌನ ವಹಿಸಿದ್ದಾಗಿದೆ. ಇದನ್ನು ಸರಿಯಾಗಿ ಗುರುತಿಸಿದ್ದ ಬಾಬಾ ಸಾಹೇಬ್ ಅಂಬೇಡ್ಕರರನ್ನು ಯಾರು ಅರ್ಥ ಮಾಡಿಕೊಳ್ಳಲಿಲ್ಲ. ಅದು ಬೇರೆಯದೇ ಚರ್ಚೆ. ದೇಶ ಸ್ವತಂತ್ರಗೊಂಡು ಅಥವಾ ಬ್ರಿಟೀಷರಿಂದ ಅಧಿಕಾರ ಹಸ್ತಾಂತರಗೊಂಡಾಗ ಇನ್ನು ಈ ದೇಶದ ಸಾಮಾನ್ಯ ಜನ ದಲಿತ;ಆದಿವಾಸಿಗಳಿಗೆ ಮತ್ತು ಹಿಂದುಳಿದವರಿಗೆ ಭವಿಷ್ಯವಿರದು ಎಂದು ಅರಿತಿದ್ದ ಅಂಬೇಡ್ಕರ್ ಅದಕ್ಕಾಗಿ ಶೈಕ್ಷಣಿಕ ಹಾಗೂ ರಾಜಕೀಯ ಕ್ಷೇತ್ರಗಳಲ್ಲಿ ಮೀಸಲಾತಿ ಅಳವಡಿಸಿದರು.

ಬ್ರಿಟೀಷರ ಆಳ್ವಿಕೆಯಲ್ಲಿ ರೂಪಿಸಲಾಗಿದ್ದ `ಕ್ರಿಮಿನಲ್ಸ್ ಟ್ರೈಬ್ ' ಕಾಯ್ದೆ ೧೮೭೧ ರ ಪ್ರಕಾರ ಆದಿವಾಸಿ ಬುಡಕಟ್ಟು ಮತ್ತು ಅಲೆಮಾರಿ ಬೇಟೆಗಾರರನ್ನು `ಅಪರಾಧಿ ಬುಡಕಟ್ಟು' ಎಂದು ಗುರುತಿಸಲಾಗಿತ್ತು. ಆದರೆ ಭಾರತೀಯ ಸಂವಿಧಾನ ಈ ಜನರನ್ನು ೧೯೫೨ ರಲ್ಲಿ ಶೆಡ್ಯೂಲ್ಡ್ ಟ್ರೈಬ್ ಎಂದು ಕರೆಯಿತು. ಹೀಗೆ ಎಸ್ಟಿ ಗಳೆಂದು ಗುರುತಿಸಲ್ಪಡುವ ಆದಿವಾಸಿ ಬುಡುಕಟ್ಟು ಜನರು ನಿಜವಾಗಿಯೂ ಮೂಲ ನಿವಾಸಿಗಳಾಗಿದ್ದು `ಅನುಸೂಚಿತ ಬುಡಕಟ್ಟು' ಎಂಬ ಪದವು ಕೇವಲ ಆಡಳಿತ ದೃಷ್ಟಿಯಿಂದ ಮತ್ತು ನಿರ್ದಿಷ್ಟ ಸೌಲಭ್ಯ ; ರಕ್ಷಣೆ ಒದಗಿಸಲು ಮತ್ತು ಹಿಂದುಳಿದಿರುವಿಕೆಯನ್ನು ಗುರುತಿಸಲು ರೂಪಿಸಲಾದ ಮಾನದಂಡ ಮಾತ್ರ.

ದುರಂತವೆಂದರೆ ಸ್ವತಂತ್ರ ಭಾರತದ ಮೇಲ್ಜಾತಿಗಳು ಅಲೆಮಾರಿಗಳನ್ನು ಇನ್ನೂವರೆಗೂ ಅನಾಗರಿಕರು; ಕಳ್ಳತನದವರು ಎಂದೆ ನೋಡುತ್ತಿದೆ. ಹೀಗೆ ಕಾಡನ್ನೇ ನಂಬಿದ ಸಾವಿರಾರು ಆದಿವಾಸಿ ;ಬುಡಕಟ್ಟುಗಳು ಈಶಾನ್ಯ ರಾಜ್ಯಗಳು ಸೇರಿದಂತೆ ಜಾರ್ಖಂಡ್, ಬಿಹಾರ, ಪಶ್ಚಿಮ ಬಂಗಾಳ, ಮಧ್ಯ ಪ್ರದೇಶ್, ಓರಿಸ್ಸಾ ಮತ್ತು ಕರ್ನಾಟಕ ಆಂಧ್ರ ಪ್ರದೇಶಗಳಲ್ಲಿ ವಾಸಿಸುತ್ತಿವೆ.

ಏನೀ ಕಂಧಮಾಲ್ ? ಯಾರೀ ಪಾನಾ ಕುಯಿ-ಕಂಧಗಳು?

ಓರಿಸ್ಸಾದ ಹಿಂದುಳಿಸಲ್ಪಟ್ಟ ಜಿಲ್ಲೆಗಳಲ್ಲಿ ಗಾಜಿಪಾಟಿ (ಗಂಜಂ) ಮತ್ತು ಕಂಧಮಾಲ್ ಕೂಡ ಎರಡು. ಇಲ್ಲಿಯ ಹೆಚ್ಚಿನ ಜನಸಂಖ್ಯೆ ಆದಿವಾಸಿಗಳಾದ ಕುಯಿ-ಕಂಧ ಮತ್ತು ದಲಿತರಾದ ಪಾನಗಳಿಂದ ಕೂಡಿದೆ. ದುರಂತವೆಂದರೆ ನೈಸರ್ಗಿಕವಾಗಿ ಸಂಪದ್ಭರಿತವಾದ ಕಂಧಮಾಲ್ ಹುಣಿಸೆ, ಅಲ್ಲ ಮತ್ತು ಅರಿಶಿನ ಬೆಳೆಗಳನ್ನು ವಿಫುಲವಾಗಿ ಬೆಳೆದರೂ ಇಲ್ಲಿಯ ಹೆಚ್ಚಿನ ದಲಿತರು ಮತ್ತು ಆದಿವಾಸಿಗಳು ಗ್ರಾಮೀಣ ಬಡ ರೈತರಾಗಿದ್ದು ಆದಾಯದ ಮೂಲವಾಗಿ ಕಾಡಿನ ಉತ್ಪನ್ನಗಳನ್ನೇ ಅವಲಂಬಿಸಿದ್ದಾರೆ. ಇಲ್ಲಿಯ ದೊಡ್ಡ ವ್ಯಾಪಾರಿಗಳೆಲ್ಲ ಪಕ್ಕದ ಗಾಜಿಪಾಟಿಯವರಾಗಿದ್ದು ಮೊದಲಿಂದಲೂ ಹಿಂದುತ್ವದ ಅಜೆಂಡಾವನ್ನು ಬೆಂಬಲಿಸುತ್ತಾ ಬಂದಿದ್ದಾರೆ.

ಇರುವುದರಲ್ಲಿಯೇ ದಲಿತ ಪಾನಗಳು ಸಣ್ಣ ವ್ಯಾಪರಸ್ತರಾಗಿದ್ದು ಅಲ್ಪ-ಸ್ವಲ್ಪ ಹಿಡುವಳಿ ಭೂಮಿ ಹೊಂದಿದ್ದಾರೆ. ಆದರೆ ಕ್ರೈಸ್ತ ಮಠಕ್ಕೆ ಮತಾಂತರಗೊಂಡ ಇವರು ಒಂದರ್ಥದಲ್ಲಿ ಜಾತಿ ಪದ್ದತಿಯಿಂದ ರೋಸಿ ಹಿಂದೂ ಆಚರಣೆಗಳನ್ನು ಧಿಕ್ಕರಿಸುತ್ತಾ ಬಂದಿದ್ದಾರೆ. ಹೀಗಾಗಿ ಹಿಂದುತ್ವದ ಬೆಂಬಲಿಗರಾದ ದೊಡ್ಡ ವ್ಯಾಪಾರಿಗಳು ಸದಾ ಇವರನ್ನು (ದಲಿತರನ್ನು) ದುರ್ಬಲಗೊಳಿಸಲು ಯತ್ನಿಸುತ್ತಾರೆ.

ಇತರೆ ಚುನಾಯಿತ ಸರ್ಕಾರಗಳು ಸೇರಿದಂತೆ ಕಳೆದ ಭಾಜಪ -ಬಿಜದ (ಬಿಜು ಜನತಾ ದಳ) ಸಂಯುಕ್ತ ಸರ್ಕಾರವು ಸದಾ ಅಧಿಕಾರಕ್ಕಾಗಿ ಸೆಣಸಾಡುತ್ತಾ ಇಲ್ಲಿಯ ಖನಿಜ ಸಂಪತ್ತನ್ನು ಲೂಟಿ ಮಾಡುವುದರಲ್ಲೇ ಮಗ್ನವಾಗಿದೆ. ಹೀಗಾಗಿ ಸಮುದಾಯದ ಅಭಿವೃದ್ಧಿಯ ನಿರ್ಲಕ್ಷ ಆದಿವಾಸಿ-ದಲಿತರನ್ನು ಶಿಕ್ಷಣ ;ಆರೋಗ್ಯ ಮತ್ತು ವಸತಿ ಗಾಗಿ ಸ್ವ-ಸಹಾಯ ಸಂಘ ಮತ್ತು ಸರ್ಕಾರೇತರ ಸಂಸ್ಥೆಗಳನ್ನು ಅವಲಂಬಿಸುವಂತೆ ಮಾಡಿದೆ. ಈ ಅವಕಾಶವನ್ನು ಬಳಸಿಕೊಂಡ ಕ್ರೈಸ್ತ ಮಿಶನರಿಗಳು ನೆರವಿನ ಹಸ್ತ ಚಾಚುವ ಮೂಲಕ ತಮ್ಮೆಡೆಗೆ ಸೆಳೆದುಕೊಂಡಿವೆ. ಆದಾಗಲೇ ಆರ್ಥಿಕ ಸಂಕಷ್ಟದಲ್ಲಿದ್ದ ಈ ಸಮುದಾಯಗಳನ್ನು ಧಾರ್ಮಿಕವಾಗಿ ಒಡೆಯಲು ಪ್ರವೇಶಿಸಿದ್ದು ಕೋಮುವಾದಿ ವಿಶ್ವ ಹಿಂದೂ ಪರಿಷತ್.

ಕ್ರಿಸ್ತೀಕರಣದ ಮೌನ ಪ್ರಾರ್ಥನೆ ;ಕೇಸರೀಕರಣದ ಹುಚ್ಚು ನರ್ತನೆ : ಅಮಾಯಕರ ಮೇಲೆ ಸತತ ದಾಳಿ

ಆಗ ೧೯೬೫ -೬೬ ದೇಶಾದ್ಯಂತ ಗೋರಕ್ಷಣ ಆಂದೋಲನ ಆರಂಭಿಸಿದ ಆರೆಸ್ಸೆಸ್ ಅದರ ಭಾಗವಾಗಿ ಓರಿಸ್ಸಾದಲ್ಲಿ ಹಿಂದುತ್ವದ ಖಾತೆ ಹೊಂದಲು ರಘುನಾಥ ಸೇಥಿ ಎಂಬ ದಲಿತನನ್ನು ವಿಶ್ವ ಹಿಂದೂ ಪರಿಷತ್ ನ ಪ್ರಚಾರಕನನ್ನಾಗಿ ನೇಮಿಸಿತು. ಅಲ್ಲದೆ ತನ್ನ ವಿದ್ಯಾರ್ಥಿ ಶಾಖೆಯಾದ ಎಬಿವಿಪಿಯ ಅಕೌಂಟ್ ಕೂಡ ಓಪನ್ ಮಾಡಿತ್ತು.

೧೯೬೪ ರಲ್ಲಾಗಲೇ ಪೂರ್ವ ಪಾಕಿಸ್ತಾನದಲ್ಲಿ ಹಿಂದೂಗಳ ಮೇಲೆ ನಡೆದ ದಾಳಿಯ ಬಿಸಿ ಈಶಾನ್ಯ ರಾಜ್ಯಗಳು ಸೇರಿದಂತೆ ಕೋಲ್ಕತ್ತಾ , ಜೇಮಶೆಡ್ ಪುರ, ರಾಂಚಿ ಮತ್ತು ರೋರ್ ಕೆಲದವರೆಗೂ ಹಬ್ಬಿತ್ತು. ಓರಿಸ್ಸಾದ ಈ ರೋರ್ ಕೆಲಾ ಸ್ಟೀಲ್ ಟೌನ್ ಶಿಪ್ ನಲ್ಲಿ ಮುಸ್ಲಿಮರ ಮೇಲೆ ನಡೆದ ಹಲ್ಲೆ ಸ್ವಾತಂತ್ರೋತ್ತರ ಒರಿಸ್ಸಾದಲ್ಲಿ ನಡೆದ ಮೊದಲ ಕೋಮು ಹಿಂಸೆ ಎಂದು ಪರಿಗಣಿಸಲಾಗಿದೆ. ಹೀಗೆ ಭಾಜಪಾ ತನ್ನ ಹಿಂದೂ ಮತಾಂಧ ದಾಳಿ ಮುಂದುವರೆಸಲು ಮತ್ತು ತನ್ನ ಮತಗಳನ್ನು ಸ್ಥಿರಗೊಳಿಸಿಕೊಳ್ಳಲು ಅಂಗ ಸಂಘಿಗಳಾದ ಬಜರಂಗ ದಳ, ವಿಶ್ವ ಹಿಂದೂ ಪರಿಷತ್ ಮತ್ತು ಸ್ಥಳೀಯ ಮಟ್ಟದಲ್ಲಿ ವನವಾಸಿ ಕಲ್ಯಾಣ ಆಶ್ರಮದ ಮೂಲಕ ಚಟುವಟಿಕೆಯಲ್ಲಿ ತೊಡಗಿತು.

ಈ `ರಾಷ್ಟ್ರ ಕಾರ್ಯ'ಕ್ಕಾಗಿ ೧೯೭೦ ರಲ್ಲಿ ಕಂಧಮಾಲ್ ಜಿಲ್ಲೆಯ ಚಾಕಪಾಡ ಪ್ರದೇಶದಲ್ಲಿ ಇತ್ತೀಚಿಗೆ ನಕ್ಷಲರಿಂದ ಹತ್ಯೆಯಾದ ಲಕ್ಷ್ಮಣಾನಂದ ಸರಸ್ವತಿ ಒಂದು ಆಶ್ರಮ ತೆರೆದ. ಆದರೆ ಇದೇ ಪ್ರದೇಶದಲ್ಲಿ ಅದಾಗಲೇ ಕ್ರಿಶ್ಚನ್ ಮಿಶನರಿಗಳು ವಿವಿಧ ಸ್ವಯಂ-ಸೇವಾ ಸಂಸ್ಥೆಗಳ ಮೂಲಕ ಕೆಲಸ ಮಾಡುತ್ತಾ, ದಲಿತರಲ್ಲಿಯೇ ಪ್ರಮುಖ ಜಾತಿಯಾದ ಪಾನಾಗಳನ್ನು ಕ್ರೈಸ್ತ ಧರ್ಮಕ್ಕೆ ಸೆಳೆಯುವಲ್ಲಿ ಯಶಸ್ವಿಯಾಗಿತ್ತು. ಹೀಗಾಗಿ ಲಕ್ಷ್ಮಣಾನಂದ ಇಲ್ಲಿಯ ಪ್ರಮುಖ ಆದಿವಾಸಿ-ಬುಡಕಟ್ಟುಗಳಾದ ಕಂಧ ಕುಯಿಗಳಲ್ಲಿ ಹಿಂದುತ್ವದ 'False consciousness ' ಅನ್ನು ಬೋಧಿಸುವಲ್ಲಿ ಯಶಸ್ವಿಯಾದ. ಅವರ ಈ `ಭಾರತೀಯ ಕೇಸರಿ' ಸಂಸ್ಕೃತಿಯ ಅಜೆಂಡಾವನ್ನು Institutionalize ಗೊಳಿಸುವುದಕ್ಕೆ ಸ್ಥಾಪನೆಯಾದದ್ದೇ ಕುಯಿ ಸಮಾಜ ಸಮನ್ವಯ ಸಮಿತಿ.

ಆದರೆ ಈ ಮೊದಲೇ ಕ್ರೈಸ್ತ ಧರ್ಮದಲ್ಲಿದ್ದ ಆದಿವಾಸಿ ಕುಯಿ ಕಂಧರನ್ನು ನಿಜವಾದ ಆದಿವಾಸಿಗಳಲ್ಲ ಎಂದು ಈ ಸಮುದಾಯದ ನಾಯಕರಿಂದ ಘೋಷಿಸಲ್ಪಟ್ಟಿತು. ಅಲ್ಲದೆ ಮತಾಂತರಗೊಂಡವರನ್ನು ಸಮಾಜದಿಂದ ಹೊರ ಹಾಕುವ ಬೆದರಿಕೆ ಮತ್ತು ಕಿರುಕುಳ ಕೊಡುವುದಕ್ಕೆ ಆರಂಭಿಸಿತು. ಇದರ ಭಾಗವಾಗಿ ೧೯೮೦ ರಲ್ಲಿ ಅದಾಗಲೇ ಕ್ರೈಸ್ತ ಮಠಕ್ಕೆ ಸೇರಿದ ಕೆಲ ದಲಿತ ಆದಿವಾಸಿಗಳನ್ನು ಮರು-ಮತಾಂತರ ಮಾಡುವ "ಘರ್ ವಾಪಾಸಿ" (ಮರಳಿ ಮನೆಗೆ) ಕಾರ್ಯಕ್ರಮದಡಿ ಮರಳಿ ಹಿಂದೂ ಧರ್ಮಕ್ಕೆ ತರಲಾಯಿತು. ಮತ್ತು ಧರ್ಮಯಾತ್ರೆ, ಯಜ್ಞೆಗಳನ್ನು ಏರ್ಪಡಿಸುವ ಮೂಲಕ ಆದಿವಾಸಿಗಳನ್ನು ವ್ಯವಸ್ಥಿತವಾಗಿ ಹಿಂದೂ ಆಚರಣೆಯ ಭಾಗವೆಂಬಂತೆ ಭ್ರಮಿಸಲಾಯಿತು.

೧೯೯೯ ರಲ್ಲಿ ಕುಯಿ ಭಾಷೆ ಮಾತನಾಡುವ ದಲಿತ-ಕ್ರೈಸ್ತರಾದ ಪಾನಾಗಳು ತಮಗೂ ಎಸ್.ಟಿ ಸ್ಥಾನ ಕೊಡಬೇಕೆಂದು ಒತ್ತಾಯಿಸಿದಾಗ ಅದಾಗಲೇ `ಕೇಸರಿ'ಗೊಂಡಿದ್ದ ಕುಯಿ -ಕಂಧಗಳು ಇದಕ್ಕೆ ವಿರೋಧ ವ್ಯಕ್ತಪಡಿಸುವಂತೆ ನೋಡಿಕೊಳ್ಳಲಾಯಿತು. ಈ ಎರಡು ಸಮುದಾಯಗಳ ತಿಕ್ಕಾಟ ಹೊಡೆದಾಟಕ್ಕೆ ತಿರುಗುವಂತೆ `ಬೆಂಬಲಿಸಿದ್ದು' ಇದೇ ಸ್ವರ್ಗವಾಸಿ (?) ಸರಸ್ವತಿ ಸ್ವಾಮಿ. ಅದೇ ವರ್ಷ ಬಜರಂಗಿಗಳಾದ ದಾರ ಸಿಂಗ್ ಮತ್ತವನ ಸಹಚರರು ಆಷ್ಟ್ರೇಲಿಯಾ ಮೂಲದ ಗ್ರಹಾಮ್ ಸ್ಟೇನ್ಸ್ ಮತ್ತು ಆತನ ಇಬ್ಬರು ಮಕ್ಕಳನ್ನು ಮತಾಂತರ ನೆಪವೊಡ್ಡಿ ವಾಹನ ಸಮೇತ ಸಜೀವವಾಗಿ ಸುತ್ತು ಹಾಕಿದರು. ಅಲ್ಲದೆ ಮಯೂರ ಭಾಂಜ್ ಜಿಲ್ಲೆಯಲ್ಲಿ ಜಕ್ವೆಲಿನ್ ಮೇರಿ ಎಂಬ ಕ್ಯಾಥೊಲಿಕ್ ಪಂಥಕ್ಕೆ ಸೇರಿದ ಸೇವಕಿಯನ್ನು ಸಾಮೂಹಿಕವಾಗಿ ಅತ್ಯಾಚಾರ ಮಾಡಲಾಯಿತು.

ಅಲ್ಲದೆ ಭಾಜಪಾ-ಬಿಜೆಡಿ (ಬಿಜು ಜನತಾ ದಳ) ದೋಸ್ತಿ ಸರ್ಕಾರದ ಬೆಂಬಲವಿದ್ದ ಆರೆಸ್ಸೆಸ್, ವಿಹೆಚ್ ಪಿ ಮತ್ತು ಬಜರಂಗಿಗಳು ೧೯೯೯ ರ ಚಂಡ ಮಾರುತ ಸಂದರ್ಭದಲ್ಲಿ `ಸ್ವಯಂ ಸೇವೆಗೆ' ಬಂದವರು ಮರಳಿ ಹೋಗುವುದನ್ನೇ ಮರೆತರು. ಇವರ ದಾಳಿಗಳನ್ನು ವಿರೋಧಿಸಿ ವಿವಿಧ ಪ್ರಗತಿಪರ ದಲಿತ ಸಂಘಟನೆಗಳು ಪ್ರತಿಭಟನೆಗಿಳಿದರೆ ಚಡ್ಡಿ-ದೋಸ್ತ್ ಸರ್ಕಾರವು 'ಸಮಾಜದಲ್ಲಿ ಅಶಾಂತಿ ಸೃಷ್ಟಿಸುವ ಇಂಥ ಮೆರವಣಿಗೆಗಳಿಗೆ ಅವಕಾಶ ನೀಡೆವು' ಎಂದು ಪೋಲಿಸ್ ಫೈರಿಂಗ್ ಗೆ ಆದೇಶ ನೀಡಿದ್ದವು. ಈ ಘಟನೆಯಲ್ಲಿ ಕಾಶಿಪುರದಲ್ಲಿ ಮೂರು ಜನ ಆದಿವಾಸಿಗಳು ಸಾವನ್ನಪ್ಪಿದ್ದರು. ೨೦೦೪ ರ ಆಗಷ್ಟ ತಿಂಗಳಲ್ಲಿ ಪೂಲ್ ಬನಿ ಜಿಲ್ಲೆಯ ಚರ್ಚ್ ವೊಂದರ ಮೇಲೆ ದಾಳಿ ಮಾಡಿದ್ದಲ್ಲದೆ , ಜಗತ್ ಸಿಂಗ್ ಪೂರ್ ಜಿಲ್ಲೆಯ ಏಳು ಜನ ಕ್ರೈಸ್ತ ಮಹಿಳೆಯರು ಸೇರಿದಂತೆ ಒಬ್ಬ ಪಾದ್ರಿಯನ್ನು ಬಲವಂತವಾಗಿ ಹಿಡಿದು ತಲೆ ಬೋಳಿಸಿ ಗ್ರಾಮದಿಂದ ಬಹಿಷ್ಕರಿಸಲಾಗಿತ್ತು.

ಆದರೆ ಮುಖ್ಯವಾಗಿ ಸಮಸ್ಯೆ ಗಂಬೀರ ಸ್ವರೂಪ ತಾಳಿದ್ದು ೨೦೦೬ರ ಡಿಸೆಂಬರ್ ನಲ್ಲಿ ಡಿ-ಲಿಮಿಟೇಶನ್ ಕಮಿಷನ್ ಪ್ರಕಾರ ಕಂಧಮಾಲ್ ಜಿಲ್ಲೆ ಯ ಸದೀಯ ಮತ್ತು ಮೂರು ವಿಧಾನ ಸಭಾ ಕ್ಷೇತ್ರಗಳು ಎಸ್ ಟಿ ಮೀಸಲು ಕ್ಷೇತ್ರವಾಗಿ ಘೋಷಿಸಲ್ಪಟ್ಟು ದಲಿತ ಪಾನಾಗಳಲ್ಲಿ ಅತೃಪ್ತಿ ಮೂಡಿದಾಗ. ಆದರೆ ಆದಿವಾಸಿಗಳಿಗೆ ಹೋಲಿಸಿದರೆ ಶಿಕ್ಷಣ, ಆರೋಗ್ಯ, ಉದ್ಯೋಗ ಮತ್ತು ಜೀವನ ಮಟ್ಟದಲ್ಲಿ ದಲಿತರ ಸ್ಥಿತಿ ಸ್ವಲ್ಪ ಸುಧಾರಿಸಿದ್ದು ಸುಳ್ಳಲ್ಲ. ಧಾರ್ಮಿಕವಾಗಿ ಈ ಎರಡು ಸಮುದಾಯಗಳು ಒಂದು ಹೊಸ ಶಕ್ತಿಯಾಗಿ ಹೊರಹೊಮ್ಮುತ್ತಿದ್ದ ಸಂದರ್ಭವನ್ನೇ ವೈಷಮ್ಯಕ್ಕೆ ತಿರುಗಿಸಲಾಗಿತ್ತು. ಹೀಗೆ ಒಂದೆಡೆ ಕ್ರೈಸ್ತ ಮಿಶನರಿಗಳು ದಲಿತ-ಪಾನಾಗಳನ್ನು ಮತ್ತು ಹಿಂದೂ ಸಂಘಟನೆಗಳು ಆದಿವಾಸಿ ಕಂಧರನ್ನು ಪರಸ್ಪರ ಎತ್ತಿಕಟ್ಟುವ ಕೆಲಸ ನಡದೇ ಇತ್ತು. ಹೊಡೆದಾಡಲು ಸಿಕ್ಕ ನೆಪವೆಂದರೆ ಲಕ್ಷ್ಮಣಾ ನಂದ ಸರಸ್ವತಿಯ ಸಾವು.

ಯಾರಿಗೂ ಕೇಳಿಸದ ದಲಿತ ಸಂಘಟನೆಗಳ ಕೂಗು.

ಸ್ವತಃ ಹತ್ಯೆಗೈದ ಮಾವೋಯಿಸ್ಟರು ಅದರ ಹೊಣೆ ಹೊತಾಗ ಕ್ರೈಸ್ತ ದಲಿತ ಪಾನಾಗಳನ್ನು ಸಂಶಯಿಸಿದ ವಿಶ್ವ ಹಿಂದೂ ಪರಿಷತ್ ಹಾಗೂ ಸಂಘ ಪರಿವಾರ ಅನಾಮತ್ತಾಗಿ ಕ್ರೈಸ್ತ ಚರ್ಚ್ ಗಳ ಮೇಲೆ ದಾಳಿ ಮಾಡಿ ಅಮಾಯಕರನ್ನು ಕೊಲೆ ಮಾಡಿದರು. Asian centre for Human Rights (ACHR) ಪ್ರಕಾರ ಕನಿಷ್ಠ ಐವತ್ತು ಜನರನ್ನು ಸ್ಥಳದಲ್ಲಿಯೇ ಸಾಯಿಸಲಾಗಿದೆ. ಅಲ್ಲದೆ ಸಾವಿರಾರು ಕ್ರೈಸ್ತ ಪಾದ್ರಿಗಳು ಜೀವ ರಕ್ಷಣೆಗಾಗಿ ಸರ್ಕಾರದ ಕ್ಯಾಂಪ್ ಮತ್ತು ಕಾಡು ಸೇರಿದರು.

ಆದರೆ ಈ ಎಲ್ಲ ಘರ್ಷಣೆಗೆ ಭೂ-ಒಡೆತನ ಆರ್ಥಿಕ ಕಾರಣ ಮತ್ತು ಕಾಡಿನ ಉತ್ಪನ್ನಗಳ ಮೇಲಿನ ಹಕ್ಕು ಸ್ಥಾಪನೆಯ ಕಾರಣ ಕೊಡುತ್ತಿರುವ ಸ್ಥಳೀಯ ಕಮ್ಯುನಿಸ್ಟ್ ಪಕ್ಷಗಲಾಗಲಿ ಅಥವಾ ಇದೊಂದು 'ಹಿಂದೂ ಮತ್ತು ಕ್ರೈಸ್ತ ಧರ್ಮದ ನಡುವಿನ ಹೋರಾಟ' ಎಂದು ಹೇಳುತ್ತಿರುವ ಮಿಷನರಿ, ಹಿಂದೂಸಂಘಟನೆಗಳಿಗಾಗಲಿ ನಿಜವಾಗಿಯೂ ದಲಿತಪರ ಕಾಳಜಿಯಿಲ್ಲ. ಏಕೆಂದರೆ ಹಿಂದೂ ಸಂಘಟನೆಗಳು ಹೇಳುವ ಹಾಗೆ ಆದಿವಾಸಿಗಳ ದಲಿತರ ಬದುಕಿನ ಸುಧಾರಣೆಯ ಯಾವ ಗುರಿಯೂ ಇವರ ಸಂಘಟನೆಗಿಲ್ಲ. ಮತ್ತು ಈ ಸಂಘಟನೆಗಳ ಗುರಿಯೂ ಇದಲ್ಲ. ಸ್ವಲ್ಪ ಮೃದು ದೋರಣೆ ಹೊಂದಿರುವ ಕ್ರೈಸ್ತರಿಗೆ ಮತಾಂತರವೇ ಅಂತಿಮ ಗುರಿ. ಈ ಮಧ್ಯೆ ಮಾವೋಯಿಸ್ಟರು ದಲಿತರನ್ನು 'ದಾರಿ ತಪ್ಪಿಸುತ್ತಿದ್ದಾರೆ' ಎಂಬ ಆರೋಪ ಹೊತ್ತಿದ್ದಾರೆ. ಇನ್ನು ಕಮ್ಯುನಿಷ್ಟ ರಂತು ಕೇವಲ 'ವರ್ಗ ಸಂಘರ್ಷ' ವೆಂದು ಆಕಳಿಸುತ್ತಿದ್ದಾರೆ.

ಆದರೆ ಒಬ್ಬ ಮನುಷ್ಯನ ಬದುಕು ಅವನು ಹಿಂದೂ, ಕ್ರೈಸ್ತ, ಮುಸ್ಲಿಂ ಅಥವಾ ಬಡವ , ಶ್ರೀಮಂತ ಮತ್ತು ಅಕ್ಷರಸ್ಥ -ಅನಕ್ಷರಸ್ಥ ಎಂಬ ಕಾರಣಕ್ಕಾಗಿ ಶ್ರೇಷ್ಠವಾಗುವುದಿಲ್ಲ. ಏಕೆಂದರೆ ಬದುಕು ಯಾವತ್ತಿಗೂ Unconditional worth. ಇಂತಹ ಕರಾರು-ರಹಿತ ಮೌಲ್ಯ ಬದುಕಿಗಾಗಿ ಹೋರಾಡುತ್ತಿರುವ ಕಂಧಮಾಲ್ ನ ಸ್ಥಳೀಯ ದಲಿತ ಸಂಘಟನೆಗಳ ಕೂಗು ಮಾತ್ರ ಕೇಳಿಸಿಕೊಳ್ಳುವ ಕಿವಿಗಳಿಲ್ಲದಂತಾಗಿದೆ.

_______________________

ಮಾಹಿತಿ ಕೃಪೆ:

* A Tragedy foretold by Bibuthi Bhushan Nandi – The Statesman, Sep 8 2008.

* Communalism in Modern India by Bipan Chandra.
* In a crucified State by Biswamoy Pati –Hindustan Times Sep 2, 2008.
* PUCL Bulletin, Feb 2003.

ಕಾದು ಕುಂತೀವಿ ನಾವು ಹೆಳವಯ್ಯ ಬಾರೋ..!

2009-04-06T05:09:00.000-07:00

ಹೆಳವ ಹೆಳವನ ತಂದೆ ಮತ್ತೇನು ತಂದೆ
ಭೂತಗನ್ನಡಿ ಒಗಟು ಬಲ್ಲೋನು ಎಂದೆ !

ಹಂಗಿದ್ದೆ ಹಿಂಗಿದ್ದೆ ಸರದಾರನಂಗಿದ್ದೆ
ಅಮವಾಸೆ ಕತ್ತಲಿಗೆ ಬೆಂಕಿ ಕಲ್ಲುಜ್ಜಿದ್ದೆನೆಂದಿ
ಊರಗೌಡನ ಉಪ್ಪರಿಗೆಗೆ ಸುಣ್ಣವಾಗಿದ್ದೆನೆಂದಿ
ಕೇರಿ ಕರಿಯವ್ವನ ಹುಟ್ಟು ತಿಳಿದೆದ್ದೆನೆಂದಿ
ಉಂಡುಗಿದ ಬೀಡಕ್ಕೆ ರಂಗೇರಿದ್ದೆನೆಂದಿ
ಹೆಳವ ಹೆಳವನ ತಂದೆ ಮತ್ತೇನು ತಂದೆ
ಭೂತಗನ್ನಡಿ ಒಗಟು ಬಲ್ಲೋನು ಎಂದೆ !

ಕಲ್ಲು ಕಲ್ಲಿನ ಮನೆಯ ಕಣಿ ಹೇಳಿದ್ದೆನೆಂದಿ
ಮಂಚ ಮಂಚದ ಮಾತಿಗೆ ಕಿವಿಯಾಗಿದ್ದೆನೆಂದಿ
ವಂಶ ಬೀಜದ ಮೂಲ ನೋಡಿದ್ದೆನೆಂದಿ
ಚುಕ್ಕಿ ಚಂದ್ರರ ಗಂಟು ಬಿಚ್ಚಿದ್ದೆನೆಂದಿ
ಭೂಮಿ ಬಾನಿಗೆ ನೀನೆ ಕತೆ ಹೇಳಿದ್ದೆನೆಂದಿ
ಹೆಳವ ಹೆಳವನ ತಂದೆ ಮತ್ತೇನು ತಂದೆ
ಭೂತಗನ್ನಡಿ ಒಗಟು ಬಲ್ಲೋನು ಎಂದೆ !

ಕಟ್ಟಕಡೆ ಗುಡಿಸಲಿಗೆ ಬರ್ತೀನಿ
ಪಾಪ-ಪುಣ್ಯದ ಗುಟ್ಟು ಹೇಳ್ತೀನಿ ಎಂದಿ
ಬಾಬಾರೋ ಹೆಳವಯ್ಯ ಮರ್ತೀವಿ ಎಂದಿ
ಕಾದು ಕುಂತೀವಿ ನಾವು ಪಂಚಮರ ಮಂದಿ
ದಿಟ ನುಡಿವೆ ಮಣ್ಣ ಕಳೆಗಿನ್ನು ಕೊನೆಗಾಲ ಎಂದಿ
ಹೆಳವ ಹೆಳವನ ತಂದೆ ಮತ್ತೇನು ತಂದೆ
ಭೂತಗನ್ನಡಿ ಒಗಟು ಬಲ್ಲೋನು ಎಂದೆ!

ಹೋಗಿ ಬನ್ನಿ ಕನಸುಗಳಾದರು ದಕ್ಕಲಿ ನಿಮಗೆ!

2009-04-06T02:52:00.000-07:00

ಕನಸು ಟಪಾಲಿನಲ್ಲಿ ಸಾವು ಮಲಗಿದಂತೆ
ಮಲಗೇ ಇದ್ದಳು ಮುದುಕಿ
ಗುಳೇ ಹೋದ ಮೊಮ್ಮಗಳ
ಹಾಲುಗಲ್ಲದ ಮೇಲೆ
ಯಾರೋ ನೆತ್ತರಿನ ಮುತ್ತಿಟ್ಟಂತೆ
ಮಗ್ಗಲು ಬದಲಿಸುತ್ತಾ
ಇಲ್ಲ ಇದು ಕನಸಿರಬೇಕೆಂದು !

ಕಳೆದ ಎಳ್ಳಮವಾಸ್ಯೆಯಲಷ್ಟೆ
ಚಿಗರೆ ಕಾಲಿನ ಪುಟ್ಟ ಪಾದಕ್ಕೆ
ಮುತ್ತಿಟ್ಟು ತಾನೆ ಕಟ್ಟಿದ ಗೆಜ್ಜೆ ಮೂರ್ಛೆಬಿದ್ದಂತೆ
ಸತ್ತ ಎಳೆಗರುವಿನ ಸುತ್ತ
ಗಿಡುಗ ; ನಾಯಿ ಮತ್ತು ಬರಗಾಲದ ಸಮಿತಿ
ಮುಚ್ಚಿಟ್ಟ ಸ್ಮಶಾನ ಪುಸ್ತಕದ ಹಾಳೆ ತೆಗೆದು
ಹಸಿವಿನ ಆಳ ಅಗಲಕ್ಕೆ ಇಂಚು ಪಟ್ಟಿಯ ಹಿಡಿದು
ನೀವು ಬಡತನ ರೇಖೆಗಿಂತ ಕೆಳಗಿನವರೆ ? ಎಂದಂತೆ
ಇಲ್ಲಿಲ್ಲ ಕಂಡಿತಾ ಇದು ಕನಸಿರಬೇಕೆಂದು
ಮತ್ತೆ ಮಗ್ಗಲು ಬದಲಿಸುತ್ತಾಳೆ ಮುದುಕಿ!

ಈ ಸಲ ಬೆಂಡೋಲೆ ಅಜ್ಜಿಗೆ
ಎಂದ ಮೊಮ್ಮಗನ ಭಾಷೆಗೆ
ನಿನ್ನ ಕನಸುಗಳಾದರು ನಿನಗೆ ದಕ್ಕಲಿ ಮಗನೆ
ಎಂದು ಹೋದ ಗಾಡಿಯತ್ತ ಕೈ ಮಾಡಿದ್ದಳು
ಖಾಲಿ ಅಂಗಳದ ಕಪಾಳಕ್ಕೆ
ಜಾರಿದ ಕಣ್ಣಹನಿ ಗುಟ್ಟು
ಸೆರಗಿಗಷ್ಟೆ ಹೇಳಿದ್ದಳು !

ಸಂಜೆ ಬರುವ ದಾರಿಯ ತಿಳಿಯಬೇಕೆನಿಸಿ
ಅಗಸೆಕಟ್ಟೆಗೆ ಅಡ್ಡ ನಿಲ್ಲಲು ಬೆಕ್ಕು
ಹಾದ ಅಮಾಯಕ ಅಂಚೆಯವನು
ತಂದ ಮೃತ್ಯುಪತ್ರದ ಮೇಲೆ
ತನ್ನದೇ ವಿಳಾಸ ಕಂಡು ನರಳುತ್ತಲೇ ಸತ್ತಂತೆ
ಬೇಸರಿಸಿಕೊಂಡ ಕಾಗೆ ಹಳ್ಳಿ ಬಿಡುವಾಗ
ಯಾಕೋ ಈಗ ಮತ್ತೊಂದು
ಸಾವಿನ ಸುದ್ದಿಯನೆ ತಂದಂತಿದೆ
ಪಕ್ಕದ ಮನೆ ಮೊಬೈಲು ಎನ್ನಲು
ತಟ್ಟನೆ ಕಣ್ಬಿಟ್ಟ ಮುದುಕಿ
ಶಿವನೆ ಇನ್ನು ಸುಳ್ಳಾಗಲಿ ಕನಸುಗಳೆಲ್ಲ ಎಂದಿತು!

ಓಡಿ ಹೋದವಳಲೊಂದು ವಿನಂತಿ..!

2009-04-03T06:32:00.000-07:00

೧
ಒಂದು ಶರದೃತುವಿನ
ಬೆಳ್ಳಂ ಬೆಳದಿಂಗಳ ರಾತ್ರಿ
ಗೋದಾವರಿ ತೀರದಿ ಮರುಳ ರಾಶಿಯ ಮೇಲೆ
ಪಿಸುಗುಟ್ಟಿದ ಮಾತಿನ ಮೇಲಾಣೆ
ಅಡುಗೆಗಾಗಿ;ಅರ್ಧ ರಾತ್ರಿಯ ನಿಮಿಷೆಗಳಿಗಾಗಿ
ಗಂಡನೊಂದಿಗೆ ಉಳಿದಾಕೆ
ಅಂದು ಮದ್ಯಾನದ ಸೋಮಾರಿ ಗಾಳಿ
ಆಕೆಯ ಎದೆ ತಾಕಿದಾಗಲೇ
ಯಾರೋ ಗಾಢ ನೋಟದಿ ಬೆನ್ನು ಸವರಿದಂತೆನಿಸಿ
ನದಿ ನೀರಿನಲಿ ನಕ್ಷತ್ರ ಹೂಗಳು
ಸ್ವರ್ಗದ ಶವ ಯಾತ್ರೆಗೆ ಹೊರಡುವ ಹೊತ್ತು
ಬಿಕಾರಿ ಸುಂದರ ತುರುಕನೊಂದಿಗೆ
ಆಕೆಯ ಹೆಜ್ಜೆ ಸಾಗಿದಂತಿತ್ತು!

ಓಡಿ ಹೋದವಳಿಗೆ
ಕಡಿಮೆಯಾದದ್ದಾದರು ಏನು?
ಪಾಪ ಮೆಲುಕು ಹಾಕಿದರು ಮರ್ಯಾದಸ್ತರು
ರಾತ್ರಿ ಊಟದ ನಂತರ!

೨
ಅಮೀರ್ `ಅಂದು ರಾತ್ರಿ
ನನ್ನನು ಅವರು ಹಡಗಿನ ಹಾಗೆ ದೂಡಿದರು
ಅವನ ಕೋಣೆಗೆ ' ಎಂದಳಾಕೆ
`ಆ ಮುತ್ತೈದೆ ಮುಂಡೆಯರೇ ಅಷ್ಟು
ಪುರಾಣ ಸ್ತ್ರೀಯರ ಹಾಗೆ ಗರತಿಗಿರಿಗಾಗಿ
ಪುಣ್ಯ ದಕ್ಕಿಸಿಕೊಳ್ಳುವ ನೆನಪದಿ
ಗಂಡಂದಿರುಂಡ ಎಂಜಲು ಕೂಡ
ಪವಿತ್ರ ಎನ್ನುವರು' ಎಂದನಾತ

೩
ಇರಲಿ,
ಅವರು ನಡೆವ ದಾರಿಗುಂಟ
ಒಂದಷ್ಟು ಅರವಟ್ಟಿಗೆ ಹಾಗೆ; ಆ ಇಬ್ಬರ ಮದ್ಯೆ
ಅಂತರ ಮರೆಸಲೊಂದು ಗೊರವಂಕ ನಿನ್ನದೇ ಹಾಡು
ಮತ್ತೆ ಮರೆಯದೆ ಆಕೆಗೆ ನೆನಪಿಸು
ಅಂಗಳಕೆ ಹಸಿರುಡಿಸಿ ; ಹುಣಿಸೆಗೆ ಹೂ-ಮುಡಿಸಿ
ಪುಟ್ಟ ಗುಡಿಸಲಿಗೆ ಒರಗಿ ಕಾದಿರುವನು ಮೀರ
ದೀದಿಯ ಬರುವಿಗಾಗಿ ಇಡೀ ಮೈದಾನವನೆ ತೆರೆದಿಟ್ಟು
ಒಮ್ಮೆ ಬಂದು ಹೋಗಲು ಹೇಳು ದಯವಿಟ್ಟು!

(ಸ್ಪೂರ್ತಿ : ಚಲಂ'ರ ಮೈದಾನಂ ಕಾದಂಬರಿ)

ಬೆರಳ ತೋರಿಸಿ ಹೊರಟುಬಿಡು ಸಖಿ!

2009-02-08T21:59:00.000-08:00

ಶವದ ಮೇಲೆ ಸುರಿಯದಿದ್ದರೇನು ಸುಗಂಧಗಳನು ಸ್ಪರ್ಶಿಸಿ ಹೊರಟುಬಿಡು ಸಖಿ
ಕಣ್ಣ ಹೂ-ಗಳು ಬಿಡುವ ಅತ್ತರಿನ ಹನಿ ಕೊಳುವವರಿರಲು ಮನ್ನಿಸಿ ಹೊರಟುಬಿಡು ಸಖಿ !

ಬದುಕುವಾಸೆಯನು ಬಸೆದುಕೊಟ್ಟೆ ಅದೊಳಿತು ಋಣಿ ನಿನಗೆ ಸ್ಮರಿಸಿ ಹೊರಟುಬಿಡು ಸಖಿ
ಸಾವ ಶಬ್ದಕೋಶಕ್ಕೆ ಈಸೊಂದು ಅರ್ಥಕೊಟ್ಟವರು ಇನ್ನಿಲ್ಲದಿರಲು ನೆನಸಿ ಹೊರಟುಬಿಡು ಸಖಿ !

ಲೋಬಾನದ ಸಂಜೆಗಳ ಕೀಮತ್ ತಿಳಿದು ಹಠಬೇಡ ಕ್ಷಮಿಸಿ ಹೊರಟುಬಿಡು ಸಖಿ
ಬಿಕ್ಕಳಿಸುವ ಚಂದ್ರ ಬೀದಿಗಿಳಿಯಲು ದೀಪಗಳ ಜರೂರೆನು ಆರಿಸಿ ಹೊರಟುಬಿಡು ಸಖಿ !

ನಾಳೆಯ ದೇವರು ನಡುರಸ್ತೆಗಿಳಿದು ಸ್ಮಶಾನದ ದಾರಿ ಕೇಳಲು ಬೆರಳ ತೋರಿಸಿ ಹೊರಟುಬಿಡು ಸಖಿ
ಜಾವದ ಇಬ್ಬನಿ ಯಾರ ಹಣೆ ಮೇಲೆ ನೀರಾಗುವುದೋ ಊಹಿಸಿ ಹೊರಟುಬಿಡು ಸಖಿ !

ಈಗಾಗಲೇ ಮತ್ತೇರಿರಬಹುದಾದ ಸುಲ್ತಾನ-ಸುಖ್ಬೀರರಿಗೆ 'ಅರೋಲಿ'ಯ ಬರುವಿನ್ನು
ಕೇವಲ ಮತ್ತೊಂದು ಬಟ್ಟಲಿಗೆ ನೆಪವೆಂದು ಒಮ್ಮೆ ತಿಳಿಸಿ ಹೊರಟುಬಿಡು ಸಖಿ!

ಆಕಾಶವಿಲ್ಲದ ಊರಿಗೆ ನಕ್ಷತ್ರ ಕಳುಹಿಸಿ!

2009-01-07T05:15:00.000-08:00

ಇಲ್ಲ ಚಂದ್ರನಿಲ್ಲ
ಸೂರ್ಯನೂ ಇಲ್ಲ
ಒಟ್ಟಾರೆ ಆಕಾಶವೇ ಇಲ್ಲದ
ಈ ಊರಿಗೆ ನಕ್ಷತ್ರ ಕಳುಹಿಸಿ
ಬೆಳದಿಂಗಳು ಬೇಡಿದ್ದು
ಯಾವ ದೇಶದ ನ್ಯಾಯ?

ಇಲ್ಲ ಹಾಡು ಹೋಗಿಲ್ಲ
ಯಾವ ಗೆರೆಯೂ ಇಲ್ಲಿ
ಹಸ್ತವೆ ಇಲ್ಲದ ಕೈಯ
ಗಿಳಿಯ ಮುಂದಿಟ್ಟು
ಭೂ-ಮಧ್ಯೆ ರೇಖೆ ಬೇಡಿದ್ದು
ಯಾವ ದೇಶದ ನ್ಯಾಯ?

ಇಲ್ಲ ಕೆರೆಯಿಲ್ಲ
ತೊರೆಯೂ ಇಲ್ಲ
ಪಸೆಯೇ ಇಲ್ಲದ ಈ ನೆಲಕೆ
ಬಿಸಿಲುಗುದುರೆಯ ಬಿಟ್ಟು
ನೀರು ಬೇಡಿದ್ದು
ಯಾವ ದೇಶದ ನ್ಯಾಯ?

ಇಲ್ಲ ಮುಖವಿಲ್ಲ
ಆಕಾರವು ಇಲ್ಲ
ಅಸಲು ಉಸಿರಾಡದ
ಈ ಹೃದಯಗಳಲಿ
ಒಲವ ಬಚ್ಚಿಟ್ಟು
ಸುಮ್ಮನಿರಿ ಎಂದದ್ದು
ಯಾವ ದೇಶದ ನ್ಯಾಯ?

ಸ್ಮಶಾನಗಳು ಮುಚ್ಚಲಿವೆ ಮನುಷ್ಯರಿದ್ದರೆ ಕಳುಹಿಸಿ!

2009-01-06T00:23:00.000-08:00

೧
ದೀಪಗಳು ಮಲಗುವ ಹೊತ್ತು
ಬಹಳ ಹಿಂದಿನ ಮಾತೇನಲ್ಲ
ಕೋಟೆ ಗೋಡೆಯ ಕೆಳಗೆ
ಅವಿತ ಕತ್ತಲಿನಲ್ಲಿ
ಹುಟ್ಟು ಹಬ್ಬಕೆ ಹುಣ್ಣಿಮೆ ನೋಡೆಂದವರು
ಸಂಜೆಯೊಂದಿಗೆ ಸಂಚು
ಹೂಡಿದ್ದು ತಿಳಿಯದೆ ಅಲ್ಲಿ
ಅಮಾಯಕ ಗಾರೆ ಕೆಲಸದ ಹುಡುಗರು
ಸುರಿದ ನಲ್ಲೆಯರ ನೆನಪಿನಾ ಮಳೆಗೆ
ನಕ್ಷತ್ರ ಹೂತಿಟ್ಟು ಆಲಿಕಲ್ಲು ಆಯುತಿದ್ದರು!

೨
ಬಿರಿದ ಎದೆಗಳ ಮೇಲಾಣೆ
ನೀವು ರಾಮಕೋಟಿಯ ಬರೆವಾಗ
'ರಾತ್ರಿಗಳು ಇಷ್ಟು ಸುದೀರ್ಘ ಏಕೆಂದು
ಇಲ್ಲಿ ದೈವಪಟದೆದುರು
ಧರಣಿ ಹೂಡಿದ್ದರು ಮುಡಿ ಸೂಳೆಯರು !
ಪಾಪ ಭಾಷಣದ ಚಪ್ಪಾಳೆಗೆ
ಕೇಳಿಸಿರಲಿಕ್ಕಿಲ್ಲ ಹೆಣಬಿದ್ದ ಸದ್ದು ಮತ್ತು;
ಹಾದ ಬುಲೆಟ್ಟಿನ ವೇಗ ಪೇದೆ ಎದೆಗೆ
ಮತ್ತೊಂದು ನಕ್ಷತ್ರ ತಂದದ್ದು!

೩
ದೇವರ ಮೇಲಾಣೆ ಆತನಿಗೂ
ನೆಮ್ಮದಿ ಇಲ್ಲ ಈಗ!
ಹಲ್ಲಿ ಆಕಳಿಸುವ ಗಳಿಗೆ
ಬೆಟ್ಟ ಕೆಳಗಿಟ್ಟ ಹನುಮನಿಗೆ ಗುಮಾನಿ,
ಹೆಬ್ಬೆರಳ ಬೇಡಿದ್ದು ಅನುಮಾನಿಸುವ
ಬೇಡರ ಹುಡುಗ ಕಟ-ಕಟೆ ಹತ್ತಿದ್ದಾನೆ!
ಕಾಲು ಸೋತ ಶಿಲಾಬಾಲಕೆ
ಜಾಹಿರಾತು ನೋಡುತ್ತಿದ್ದಾಳೆ ಕೂತು
'ಶ್ರಮಿಸುವ ಪಾದಗಳಿಗೆ ಸವೆದ ಚಪ್ಪಲಿ!

೪
ಇನ್ನು ತೋಪಿನಲ್ಲಿ
ತೂರಿಬಿಟ್ಟ ಮುತ್ತು ತನಗೆ ತಲುಪಿಲ್ಲ
ಎನ್ನುವ ಆಕೆಯ ದೂರನು ಆತ
ಸಂದೇಹ ಪಡುತ್ತಾನೆ!

೫
ಸಂಜೆ ಸಮಾಧಿಯ ಮೇಲೆ
ಸೌಗಂಧಿಯ ಹೆರಿಗೆ
ಸಹಿಸಲಾಗುತ್ತಿಲ್ಲ ಪಾಪ ಮೊದಲ ನೋವು
ಅಮಾಯಕ ಹಕ್ಕಿ ಮರಿಗೆ!
ಅಗೋ ಸ್ಮಶಾನಗಳು ಮುಚ್ಚಲಿವೆ
ದಯವಿಟ್ಟು ಮನುಷ್ಯರಿದ್ದಾರೆ ಕಳುಹಿಸಿ!

2009-01-01T23:36:00.000-08:00

ನಿಮ್ಮ ಮನೆಯೆದುರಿನ

ಮಲ್ಲಿಗೆ ಬಳ್ಳಿ

ಇಂದು ಎಂದಿಗಿಂತ

ಹೆಚ್ಚು ಹೂ ಬಿಡಲಿ;

ಒಳ್ಳೊಳ್ಳೆ ಗೆಳೆಯರಿಗೆ

ಸಿಹಿ ಕನಸು ಬಿದ್ದಂತೆ!

ಎಳೆಯ ಪಾಪದ ಹೆಸರು ನಿಮ್ಮಿಚ್ಚೆಯಂತೆ ಇಟ್ಟುಕೊಳ್ಳಿ !

2008-11-26T06:12:00.000-08:00

೧

ಬಂದೇನು ಬರುವೇನು

ಭವದ ಭಾರವ ಜಗುಲಿಯಲಿ ತಗುಲಿಸಿ

ಕುದಿವ ನೆತ್ತರ ಸಾರಿಗೆ ಉಪ್ಪು ಹುಡಿಕಿ

ಉತ್ತವರ ಬೆವರು ಇಂಗಿ ಬಿಟ್ಟೀತೆ ಮಣ್ಣು

ಮರೆತು ಬಿಟ್ಟಂತೆ ಬೀಜ ನುಂಗಿದ ಭೂಮಿ

ಚಿಗುರುವ ; ಕಾಯುವ ಕಾಯಕವ ಇನ್ನು!

೨

ತಂದೇನು ತರುವೇನು

ನಿಮ್ಮ ಪಾದುಕೆಗೆ ಜಾಜಿಮಲ್ಲಿಗೆ ಹೂವಾ!

ಅಳುವ ಬಸುರಿಯ ಎಳೆದು ಹಸೆಮಣೆಗೆ ತಂದಂತೆ

ಪಾಪವಾವುದು ಒಡೆಯ ಒಡಲು ತುಂಬಿದ್ದೆ ?

ಅಥವಾ ಹಗಲಿಗೆ ಹಂದರನೆಟ್ಟು ; ಬಾಸಿಂಗ ಕಟ್ಟಿದ್ದೆ!

ತಿಳಿಯದು ತಿಳಿ-ತಿಳಿಯ ಕೊಳದಿ ಮೀನು ಉಂಡಂತೆ !

೩

ಕಂಡೇನು ಕಾಣೇನು

ಬಿಲ್ವ ಪತ್ರದ ತುಂಬ ನಿಮ್ಮ ಚಿತ್ತದ ಬಿಂಬ!

ಹೊರಟು ಹೋದವರು ಹೋಗಲಿಲ್ಲ ಬರಿಗೈಲಿ

ನುಡಿದು ಬಿಟ್ಟಿರಿ ' ಶುಭವಾಗತೈತೆ ! ಶುಭವಾಗತೈತೆ!

ಹಿಡಿ ಹಿಡಿದು ಎಡೆ ತೆಗೆದು ಕಾದಿಟ್ಟೆ ಜಂಗಮನಿಗೆ

ಯಾವ ಕಾಗೆಯೂ ಹಾಯಲಿಲ್ಲ ಇನ್ನಿತ್ತ ಒಂದು ಗಳಿಗೆ !

೪

ಬಿಟ್ಟೇನು ಬಿಡುವೇನು

ಮುತ್ತ್ಯಗಳ ಮುತ್ತ್ಯ ಜೀವ ಎಂದಿಗೂ ಸ್ತುತ್ಯ !

ಹೇಳಿ 'ಮರುಳ'ದ ಮಾತು ವಚನವಾದಿತು ಹೇಗೆ ?

ತಿಪ್ಪೆಯಲಿ ಚಿಗುರಿದ ಹುಣಿಸೆ ಪುಕ್ಕ ತಾ-

ಕಾಯದು ಯಾರ ಬರುವಿನ ದಾರಿಗೆ

ಅರಳಿ ಹೋಳಾಯಿತು ಜೀವ ಪಾರಿಜಾತ!

ಕನ್ನಿದ್ದರೆ ಕಂಡು; ಎದೆ ಗವಚಿಕೊಳ್ಳಿ

ಎಳೆಯ ಪಾಪದ ಹೆಸರು ನಿಮ್ಮಿಚ್ಚೆಯಂತೆ ಇಟ್ಟುಕೊಳ್ಳಿ!

ಎದೆ ಭಾರ ಸುರಿದವಳು ಅರ್ಥ ಪಿಸುಗುಡುವೆಯಲ್ಲ!

2008-11-05T22:23:00.000-08:00

ನಿನ್ನ ನೆಪವಿಲ್ಲದೆ ಹೊಟ್ಟೆತುಂಬ ನಗಬಹುದು ಬಲ್ಲೆಯಾ ಪಾರು
ಹೇಳಿಕೊಡು ಹೇಗೆ ದು:ಖ್ಖಿಸುವುದು ನಿನ್ನ ನೆಪವಿಲ್ಲದೆ ಪಾರು!

ಹಲ್ಲು ಕಿರಿಯಲು ಜಗದಿ ಏಸೊಂದು ಮುಖಗಳಿವೆ ಬಲ್ಲೆಯಾ ಪಾರು
ಒತ್ತರಿಸುವ ಅಳುವಿಗೆ ಕಣ್ಣಾಲಿ ನೀನು ಎಷ್ಟೊಂದು ಜರೂರಲ್ಲವೇ ಪಾರು!

ಸುಮ್ಮನಿರಲು ಯಾರ ಪ್ರಸ್ತುತಿಯು ಅಪ್ರಸ್ತುತ ಬಲ್ಲೆಯಾ ಪಾರು
ಜಗಳವಾಡಲು ಕಡೆಗೆ 'ಜೀವ' ಮುನಿದಿರಬೇಕಲ್ಲವೇ ಪಾರು!

ಅಂದಗತ್ತಿಯರ ಸಾವು ಸಾಕಿನ್ನು ತಾರೆಗಳು ಜಾರದಂತೆ ಹೇಳಬಲ್ಲೆಯಾ ಪಾರು
ಸಂಜೆ ಹಿತ್ತಲಿಗೆ ಬರುವೆ ಕಡುಗಪ್ಪು ಮುಖಮಾಡಿ ಸುರಿದು ಉತ್ತರಿಸುವಿಯಲ್ಲವೇ ಪಾರು!

ಹನಿ ಆವಿಯಾಗಳು ಯಾರ ಶಿಫಾರಸ್ಸು ಬೇಕು ಬಲ್ಲೆಯಾ ಪಾರು
ಹೊತ್ತ ಎದೆಭಾರ ಸುರಿದವಳು ನೀನು ಹಗುರದರ್ಥ ಪಿಸುಗುಡುವಿಯಲ್ಲವೇ ಪಾರು!

ಕನಸು ಹಾಯದ ರಾತ್ರಿ 'ಅರೋಲಿಗೆ' ಬೇಡವಾಗಿದೆ ಬಲ್ಲೆಯಾ ಪಾರು
ನಿನ್ನ ಅನುಪಸ್ಥಿತಿಯಲೂ ನಗು;ಹಸಿವುಗಳು ನೆನಪಾಗದಂತೆ ಮರೆಸಬೇಕಲ್ಲವೇ ಪಾರು!

ಆರು ಹಾಯ್ಕು

2008-11-05T21:45:00.000-08:00

೧
ಆಕಾಶ ಕಡಲಲಿ
ಲಂಗರುಯಿಲ್ಲದೆ ಅಲೆದವು
ಮೋಡದ ಹಡಗು!

೨
ಹುಲ್ಲು ಕತ್ತಿಯ
ಇರಿದು ಕೊಂಡಿವೆ
ಇಬ್ಬನಿಯ ಶವ!

೩
ಕಣ್ಣಿರು ಒರೆಸಲು
ರೆಪ್ಪೆ ಹೊಲೆದರೆ
ಆಕಾಶದಗಲ ರಕ್ತಪಾತ!

೪
ಕಣ್ಣ ಹನಿಗಳ
ಕೊಳ್ಳುವವರಿದ್ದಿದ್ದರೆ
ಹೆಣ್ಣುಮಕ್ಕಳೇ ಶ್ರೀಮಂತರು!

೫
ಮೀನು ಈಜು ಕಲಿಯವು
ಏಕೆಂದರೆ ಅವಕ್ಕೆ
ತರಬೇತುದಾರರೆ ಅಲಭ್ಯ!

೬
ಕಣ್ಣಿರು
ಕುಡಿಯುವಂತಿದ್ದರೆ
ಸಮುದ್ರಗಳೇ ಖಾಲಿ!

***

ಇತಿಹಾಸ ನೆಪವಾಗುತ್ತದೆ ಮನೆಯೆದುರಿನವನಿಗೆ!

2008-10-30T01:04:00.000-07:00

ಪ್ರತಿ ಸೈನಿಕನು ಸಾಯುತ್ತಾನೆ
ವೀರಗಲ್ಲು ಆಗಬೇಕೆಂದಲ್ಲ
ಅಂತ:ಪುರದಿ ಹಾಸಿಗೆ
ಹಂಚಿಕೊಂಡ ದಾಸಿಯರು
ಸಿಂಹಾಸನದ ದಿನ ಹೂ ಸುರಿದಷ್ಟೇ ಸರಳ !

ಸತ್ತ ಉತ್ತರಕುಮಾರನ
ಸಮಾಧಿಯ ಮೇಲೆ ತಲವಾರು
ನೆಡುತ್ತಾರೆ ; ತರುವಾಯ
'ವೀರ ಸ್ವರ್ಗವಾಸಿ ಪ್ರಚಂಡ ದಿಗ್ವಿಜಯಿ'
ಎಂದು ಬರೆದವನ ಬೆನ್ನಿಗೆ
ಚೂರಿ ಇಡುತ್ತಾರೆ!

ನಗಾರಿ ಸದ್ದಿಗೆ ಹೆಜ್ಜೆ ಹಾಕಿದವರೇ
ಊರು ತೊರೆದರು
ಅವರವರ ಆಯುಷ್ಯದ ಬಿಂದಿಗೆ ಹೊತ್ತು!

ಕೋಟೆಯ ತುಂಬ ಈಟಿ
ಕಂಡವರ ಹೃದಯದಲಿ ಲೋಹ
ಹರಿಯುತ್ತಿರಬೇಕು!

ಎದುರಾಳಿಯ ಮಾಹಿತಿಯಿಲ್ಲದವರು
ವಿಳಾಸ ಹುಡಿಕಿ ಹೊರಟಿದ್ದಾರೆ
ಒಂದುವೇಳೆ ಅಂದುಕೊಂಡಂತೆ
ಅವರ ಮುಖದ ಮೇಲೆ ಗಡ್ಡ, ಬಿಳಿ ಟೊಪ್ಪಿಗೆ
ಅಥವಾ ಕೊರಳಲ್ಲಿ ಕ್ರಾಸಿನ ಚಿನ್ಹೆಗಳಿದ್ದರೆ
ದಾಳಿ ನಿಶ್ಚಿತವೆಂದು ಸಾರಲು!

ಹಾಗೆ ಮೈದಾನದಲಿ ಮೈಮರೆತ
ಅವರ ಮಕ್ಕಳು ಕುಡುಕ; ತಲೆಹಿಡುಕ
ಮತ್ತೆ ಕೊಲೆಗಡುಕರಾಗುತ್ತಾರೆ , ಇಲ್ಲ
ಅವರೂ ವಿಳಾಸ ಹುಡುಕಿ ಹೊರಡುತ್ತಾರೆ
ಹೀಗೆ ಇತಿಹಾಸ ನೆಪವಾಗುತ್ತದೆ
ಮನೆಯೆದುರು ಬದುಕುವವನಿಗೆ!

-ಅರೋಲಿ ರಮೇಶ್.

ಇನ್ನು ಬರಹೇಳೆವೆಂದು ಮಾತುಕೊಡಿ !

2008-08-30T03:01:00.000-07:00

ಎಲೆ ಅಸಹಾಯಕ ಕೊಠಡಿಗಳೇ
ದಯಮಾಡಿ ಒಮ್ಮೆ ಕಿವಿಗೊಡಿ
ಈಗ ಮತ್ತಷ್ಟು ಕತ್ತಲಾವರಿಸಲಿದೆ
ನೀರವ ಗ್ರಂಥಾಲಯದ
ಮಹಾನ್ ಚರಿತ್ರೆ ಪುಟಗಳೆದುರು ಕೂತವನಿಗೆ
ಸಮಾಧಿಯಲಿ ಹೂತವನ ಭೀತಿ!
ಬೆರಳುಗಳು ರಕ್ತ ತಾಕುವ ಮೊದಲು
ನನಗೊಂದು ಮಾತುಕೊಡಿ!

ಬೆಳಗಾಗುವುದರೊಳಗೆ
ಓಡಿ ಹೋಗಬೇಕೆಂದುಕೊಂಡವನ
ಕಾಲು ಬಿಗಿದ ಸರಪಳಿಯ ಸದ್ದು
ಆ ಅಮಾನುಷರಿಗೆ ಮುಟ್ಟಿಸಲಾರೆವೆಂದು !

ಮತ್ತು; ನನ್ನ ಸಂತೈಸಲು
ಕೈ ಚಾಚುವ ಸೂಲಗಿತ್ತಿ ಚಾಳಿಯ
ಕಾವ್ಯ ಪುಸ್ತಕಗಳನ್ನು
ಕಪಾಟಿನಾಚೆಯ ಕಿಟಕಿಯಿಂದ
ಹೊರಬಿಡೆವೆಂದು ಮಾತುಕೊಡಿ!
ಜೊಲ್ಲು ಸುರಿಯಿಸುವುದಷ್ಟೇ ಗೊತ್ತವಕ್ಕೆ
ಒಣ ವರ್ಣನೆ ಕಲ್ಲಿಗೆರಿದ ನೈವೇದ್ಯ
ಉಜ್ಜಿಕೊಂಡವನಿಗವು ಅನಗತ್ಯ ಶಬ್ದ !

ಹಾಗೆ ಈ ರಾತ್ರಿ ಹೊರಡುವ ಸುದ್ದಿ
ಆ ಮುದಿ ಮ್ಯಾಕ್ ಬೆತ್ತಲಿಗೆ ತಿಳಿಯುವುದು ಬೇಡ
ಮೊಂಬತ್ತಿ ಹಿಡಿದು ಕತ್ತಲೆ ಹುಡುಕುವ
ಅವಳದೊಂದು ವಿಚಿತ್ರ ಜಡ್ಡು!

ಅಗೋ ಅವಳು ಈ ಕಡೆಗೆ ಬರುತ್ತಿದ್ದಾಳೆ
ನಾನಿನ್ನು ಹೊರಟೆ...
ನಾಳೆ ಆ ಕಡೆಯ ಕಪಾಟಿನಲ್ಲಿ
"ಆತ್ಮ ಹತ್ಯೆಗೆ ಹೆದರಿದವನ ವೀರ ಚರಿತೆ"ಗೆ
ತಲೆಬರಹವಾಗುವ ಮುನ್ನ
ಮತ್ತೆಂದೂ ಬರಹೇಳೆವೆಂದು ಮಾತುಕೊಡಿ!

ಗಜಲ್ -೧

2008-06-24T00:11:00.000-07:00

ಗಜಲ್ -೧

ಹೆಚ್ಚೆಂದರೆ ತುಫಾಕಿ ಎದೆಗೇರಿಸಿ ತುಂಡರಿಸಬಲ್ಲಿರಿ ನೀವು
ಇಲ್ಲ ಎನ್ಕೌಂಟರ್ ನಲಿ ಸಾವ ನಿರೀಕ್ಷಿಸಬಲ್ಲಿರಿ ನೀವು!

ಓದಲಾಗದು ಸ್ಮೃತಿಪಟಲ ಪಡಿಯಚ್ಚು
ಒಡೆಯನಿಗೆ ಕಣ್ಣು ಕಿತ್ತಿಟ್ಟ ಬಗೆ ವಿವರಿಸಬಲ್ಲಿರಿ ನೀವು!

ಕಾಯಿದೆಗಳ ಹೊರಡಿಸಿ ನಿಷೇಧಿಸಲಾಗದು ನಿಟ್ಟಿಸಿರು
ನೆಲ ಸೀಳುವ ಮೊಳಕೆಯೆದುರು ದನಿ ಎತ್ತರಿಸಬಲ್ಲಿರಿ ನೀವು!

ಇನಿತು ಸುಟ್ಟು ; ಕತ್ತರಿಸಿ ಗಲ್ಲಿಗೆರಿಸಿದವರ
ದಫನ್ನಿಗೆ ಜನ ಸೇರದಂತೆ ಆದೇಶಿಸಬಲ್ಲಿರಿ ನೀವು!

ಮೆದುಳುಗಳಿಗೆ ಹೃದಯ ತರಬೇತಿ ಒಂದು ವಿದ್ರೋಹ
ಕಟಕಟೆಯಲಿ ನಿಂತ ಕಾಡುಗಳಿಗೆ ಏನೆಂದು ಉತ್ತರಿಸಬಲ್ಲಿರಿ ನೀವು!